Vawiin chawhma khan Lunglei District ah National Deworming Day (NDD) launching programme Southern Flower School, Chanmari Lunglei ah hman a ni.

He launching programme hi Dr. VR Ralte, AHEO District Education Office, Lunglei in function programme a kaihruaia. District Senior Medical Officer Dr. Lalrinthangi'n thusawiin  naupang kum 1-19 inkar zawng zawng te a thlawna Rulhut hlo ei tur pek vek a nih tur thu a sawi. School kal te chuan mahni school ah eitur a ni dawn a, school kal lo te tan Anganwadi Center ah eitur a ni ang a ti. Hemi ni a ei remchang lo te tan Date 16th August, 2019 Mop Up Day ah hian School leh Anganwadi Center ah te ei ve lo te an lo awm palh hlauh chuan ei tir ngei ngei tur a ni ati bawk. Lunglei District a naupang Kum 1-19 inkar target zat hi 50667 a nih thu a tarlang bawk. Rulhut hlo naupang Kum 1-19 inkar ten ei vek a ngaihna chhan te leh Rulhut in kan taksa a hna a thawh dan te leh Rulhut pai lo tura kan inven dan tur te a sawi bawk.

Dr. Thani Pachuau CMO, Chief Guest in thusawiin Naupang hriselna hi sawrkar in a ngai pawimawh em em a, nakin lawk a kan ram tan mi tangkai tur leh ram hmasawnna thlen thei tu turte an la nih dawn avangin Sorkar in Programme tha tak tak a kal pui thu asawi a, Rulhut hlo pawh kum tin vawihnih a thlawnin sem thin anih thu a tarlang a, Rulhut pai Naupangte ah hriselna kawngah harsatna an neih thin dan te tarlangin chumi laka kan inven chu a ngai a ni a ti bawk.

Pi C. Duhveli, District PO (ICDS) in lawmthu sawina hun a hmang bawk.