Vawiin chawhma dar 11:00 khan Aizawl DC leh DEO ni bawk Pu Vanlalngaihsaka, IAS kaihhruaina hnuaiah DC Conference Hall, Aizawl ah Lok Sabha inthlanpui leh Aizawl West I Assembly bial Bye Election neih taka, vote chhiar May ni 23 a, vote tlate chhiar dan tur ruahmanna te thlir hovin meeting neih a ni a. Meeting ah hian SP Aizawl; SP Traffic Aizawl; Joint Director, I&PR Department; Addl. DC pahnihte; heng inthlanna a RO leh ARO te bakah election kaihhnawih official dangte an tel a ni.

Pu Vanlalngaihsaka chuan vote chhiar tura inpuahchahna kalpui mek te leh la hmabak hrang hrang tlangpui te tarlangin venhimna leh traffic movement chungchang chu ECI duhdan ang ngeia kalpui anih theih nan ruahmanna siam turin SP Aizawl leh SP Traffic Aizawl te chu a ngen a. I & PR Department pawh Counting Centre ah Media Centre siam dan chungchang leh hengte hi hneh taka vil anih theih nan ruahmanna siam turin a ngen bawk a ni.  

Ruahman lawk tawh angin, Aizawl ah Counting Centre pathum a awm dawn a, chungte chu – Treasury Square-a Assembly Annexe, Mualpuia, R. Dengthuama Indoor Stadium leh Sikulpuikawna, Government Aizawl College te an ni a. Government Aizawl College Counting Centre bikah hian Aizawl West I Assembly bial Bye Election a vote tla te chhiar a ni dawn a, Counting Centre pahnih dangah Aizawl District huam chhunga Lok Sabha Inthlanpuia vote tla te chhiar a ni dawn a ni. Assembly Annexe Counting Hall ah hian District hrang hranga vote chhiar te a lutkhawm dawn bawk a ni.