Vawiin chawhma khan Administrative Training Institute (ATI) Auditorium, New Capital Complex, Aizawl ah Power and Electricity Department chuan Review meeting Ni hnihna an hmang a, he hun hi Pu R Lalzirliana, Power & Electricity Minister in a hmanpui a Pu B Lalhmingthanga, Secretary in telpuiin Er. C. Lianlunga, Engineer-in-Chief in a kaihruai a ni. 

Power & Electricity Department Minister Pu R Lalzirliana chuan,” Thawh hona tha hnuaiah chuan hna a sawt in hnathawh pawh a nuam thin a, thawh hona thalo hnuaiah erawh chuan hmasawn a har hle thin a ni”, tiin inpawh tak leh boruak nuam tak kar a thawh ho a pawimawh zia a sawi a ,” Power & Electricity department a thawktute hi pisa kai hun pel a hna in thawh nasat zia hi kan hai lova, line khaihlak chang pawh a in thawrimna avanga  veng tam takin eng kan chhi leh zung zung thei thin hian thawktute inpekna a ti chiang in a ropui hle a ni” a ti bawk. Minister chuan department hnuai a hmalakna hrang hrang awm te chu hun tak a zo thin turin leh tha thlah lova vil reng turin leh huaisen tak a hna thawk turin a chah a,” Dan ang tak leh dik taka hna thawk thin te tan hlauh tur a awm lo a ni” a ti. Pu R Lalzirliana chuan department hnuai a hmalakna leh harsatna awm thei te chu department a hotuten an hriat chian hle a tul thu sawiin,” Department a hotu in a bial chhung a tlawh that hian a hnuaia thawktute leh mipuite a ngaihven zia a lan tir a, mipuite a thlamuan mai bakah hna pawhin a sawt phah hle thin a ni,” a ti.

Er. C Lianlunga, Engineer-in-Chief chuan kal khawmte lawmna hun hmangin, Review meeting a an lo sawi ho tawh tlangpui te tar langna hun a nei a, P&E department hnuaia hma lakna hrang hrangte sawiin, Grid Discipline tha zawm a pawimawh thu a sawi a,” Kawlphetha pekchhuahna kawngah harsatna a awm hian, a chhan leh vang te, hma lak anih zel dan te inhrilhhriat zung zung hi kan mawhphurna a ni a, kan thawh hona kawngah pawh a sawt phah hle dawn a ni” a ti. He hunah hian P&E department chhung a SDO chin chung lam an tel a, Er. Jolly Newman, Chief Engineer (RE) in lawmthu sawina hun hmang in chawhnu ah Electrical Safety, Electrical Accident, Grid Discipline leh Tariff & Directives thupui  hmangte in presentation ngaihthlak a ni bawk a ni.

Ni 2 chhung Review meeting ah hian kum kal lai mek a project lian hrang hrang hnathawh chin leh hmachhawp te, mumal leh tha zawk a mi tin hnen a power supply pek anih theih nan a tih tul pawimawh hmasa awmte chipchiar tak a zir ho na neih a ni.

 Ni khatna hi Er C. Lianlunga, Engineer-in-Chief, in kaihhruaiin, Project works hrang hrang a hma lakna te sawi ho a ni a, hun tiam chhung a tha tak a heng project te hi zawh ngei anih theih nan hmachhawp leh bawhzui nghal tur pawimawh tak tak te duan chhuah a ni. Developmental works lian tak tak kalpui mekte sawi ho niina, chung project te chu power a kan intodelh nan a Hydro project hna kal lai mek, Tlawva SHP 5 MW, Kawlbem SHP 4 MW te bakah Hydel station awmsa tih changtlunna hna Maicham, Tuipang (L) leh Teirei SHPs te an ni a, Hydro Project siam belhna tur hna kal lai mek Tuirini (24 MW), Tuivawl (42 MW), Mat Sekawi (70MW), Tuichang  (100MW) leh Tuipui (40MW) te a huam a ni. 

Saubhagya Programme hnuai a Mizoram a khua zawng zawng leh in tin a eng pek programme te, mipui ten power tha leh mumal zawk an lo neih nana a Distribution network tih changtlun nan IPDS hnuai a hna kal lai mek te, Power Transformer lian zawk leh voltage sang zawk a power sem kual nan a tul, Transmission & Transformation lian zawk din leh zam chhuah hna NEC leh DoNER hnuai a hna hrang hrang kal mek te sawi ho a ni a. Khawvel hmasawnna in a ken tel appliances chi hrang hrang te mil a power department pawh in hma a sawn ve zel theih nan a Software hrang hrang tih changtlun leh din thar te leh Information Technology lam a chak zawk a hma lakna programme kal lai te chipchiar tak a sawiho a ni.

 Heng project lian tak tak kal lai mek atan a sanction tling khawm hi Rs 1600 Crores a ni a. Mizoram khua zawng zawng a eng pek hna hlenchhuak tur leh khawl bun thar hrang hrangte enkawl tur hian a hnathawktu lam indaih lohna a sang hle a an hriatthu te sawiin, a tul zual phuhruk nan a hmalakna tur te pawh meeting ah hian chhawp chhuah a ni.

 A ni hnihna Seminar ah hian mithiam ten presentation pe in Electrical accident lak a mipui te leh a thawktu te an lo him zawk nan a tih tur leh tih loh tur te, Power pek leh semchhuah na atan a Transmission leh Tranformation te hi India ram pum inthlunzawm vek anih avang a Grid Discipline neih a tul zia leh pawimawhnate, Electric hmanna man Tariff chungchangte leh hunbi tiam chhunga electric complaint siamthatna hna kenkawh dan tur chungchangte zir ho leh sawi hona neih niin P&E Department chhung a Promotion hmu tharte lawmpuina programme hman zui nghal a ni bawk.