No.7978/2020-2021

Aizawl, 31st March 2021 : Vawiin khan Aizawl D.C. Dr. Lalhriatzuali Ralte, IAS, hovin ama office chamber-ah tunhnai March ni 2, 2021-a Union Minister for Social Justice & Empowerment-in a tlangzarh, mipui mimir, a bik takin piangphunga rualbanlo ten awlsam zawka an harsatna chi hrang hrang sorkar hnenah an thlen theihna tur app ‘Sugamya Bharat App’ chungchang sawiho a ni.

Meeting kaihruaitu Aizawl D.C. Dr. Lalhriatzuali Ralte chuan sorkarin rualbanlote leh kum lama upate ngai pawimawhin an hamthatna tur atan nasa takin hma a la mek zel a, chung zingah chuan an mamawh leh harsatna tawhte pawh sorkar beng tithleng zung zung tura app thar ‘Sugamya Bharat App’ tlangzarh a ni ta hi lawmawm a tih thu a sawi a. Inthlan leh sorkar hun pawimawhah te pawh pianphunga rualbanlo leh tarte tan ruahmanna siam sak an ni thin a, midangte nena intlar ngai lovin, heng - wheelchair, ramp, waiting shed bakah anmahni tanpuitu turte ruat a nih thin thu a tarlang bawk. Hemi piah lamah sorkar chuan an mamawh ang leh awlsam taka an hman theih tur app a siam hi an vanneih hle thu sawiin D.C. chuan a mawhphurtu department Social Welfare & Tribal Affairs chuan media leh workshop/training kaltlanga mipuite hrilh hre zau zel turin a chah a ni.

‘Sugamya Bharat App’ hi Department of Empowerment of Persons with Disabilities (DEPwD), GoI-in Accessible India Campaign (Sugamya Bharat Abhiyan) hnuaia a hmalakna pakhat a ni a, He app hi a duhte tan Playstore emaw IoS atangin download theih mai a ni. He app hmang hian rualbanlote leh mipui mimirin sorkar emaw mimal office/building-ah emaw awlsam zawka an tana kal/luh/lawn theihna tur chungchangah harsatna an tawhte leh sutkian dan tura rawtna an neihte pawh, a hmun thlalak nen, an register (thehlut) thei dawn a ni. ‘Sugamya Bharat App’ atan hian Central leh State Level-ah nodal officer ruat vek an ni a. Central level-ah he app hmanga complaint lo lutte endik (screen) tur leh atul anga bawhzui turin Project Management Unit (PMU) siam a ni ang a, State level-ah District Magistrate/Deputy Commissioner chu Nodal Officer a ni thung dawn a ni.