No.7977/2020-2021

Kolasib dated 31st March 2021: Vawiin chawhnu khan Govt. Kolasib College Main building chung Main Hall, MLA fund cheng nuai 10 hmang a sak pum tak, hawnna hun hman a ni a, bialtu MLA Pu K.Lalrinliana, Food, Civil Supplies and Consumer Affairs Department Minister chu khuallian a ni a, Dr.H.Lalthlangliana, Deputy Commissioner, Kolasib chu khual zahawm a ni bawk.

Minister Pu K.Lalrinliana chuan 1978 a Kolasib College din tan a nih dante leh Govt. Kolasib College changtlung tak ni tur a hmasawnna kawng a zawh chhoh dan sawiin neitu nihna thinlungpu mi thawktute hmalakna leh inpeknaah lawmthu a sawi. Minister chuan zirlaite chu hmathlir thui tak nei a, an nih tum leh an zirchhuah tum te ruahman fel a, hlawhtlin tum a bei tlat turin a chah a, tawng dang thiamna kawngah pawh Govt. Kolasib College chu hmang tangkai turin a chah. Khuallian chuan Mizoram leilung hausaknate chu sik leh sa inthlakna avangte leh humhalh that tawk loh avangtein a chereu nasat thu a sawi a, hemi kawngah hian zirlaite chu ngaihtuahna seng peih turin a fuih bawk a ni. Intodelhna kawngah hmasawn kan la mamawh nasat zia tarlangin FCS&CA Department hnuai a Mizoram chhung a ration buhfai sem thin ah Mizoram chhung a tharchhuah a tel ngai loh thu leh ram pawn atanga chawk luh vek thin a nih thu a sawi a, ram leilung hausakna haichhuak thiam a, intodelhna kawng a hmasawnna thlentu nih tum theuh turin zirlaite a chah a. Govt. Kolasib College, Annual Magazine 2019-20 chu he hunah hian Minister hian a tlangzarh nghal bawk a ni.

Dr.H.Lalthlangliana, Deputy Commissioner chuan thusawiin zirlai chuan an zirlai chauh ngaihtuah a, zirna lak a an rilru la peng thei thil hrang hranga inhnamhnawih lo turin a chah a, khawtlang leh kohhran tan pawh mithiam inzirchhuakte chu an tangkaiin an thawh hlawk zawk thin thu sawiin tumruhna nen chhel tak a zirin, ram leh hnam tan a mi hmantlak a inzirchhuak turin a fuih bawk a ni.

Dr.C.Lalmuankima, Principal, Govt. Kolasib College chuan kalkhawmte lawmna thu sawiin College chanchin tlangpui a tarlang a, zirna thuang thum, B.A, B.Sc leh B.C.A zirna kalpui a nih thute leh zirlai 661 an awm mek thu a tarlang bawk a ni. Pu T.Zahmingliana, Associate Professor chuan Main Hall hawnna hun hi kaihruaiin zirlai atangin zai leh hnam lamte entir a ni a, Pu F.Lalhmunsiama, Associate Proffesor-in lawmthu sawina hun a hmang bawk a ni.

Govt. Kolasib College Main Hall sak pumna tur hian bialtu MLA Pu.K.Lalrinliana chuan MLA fund atangin cheng nuai 10 a pe a, thawktu indaihlohna avanga harsatna sutkian a nih theih nan amah insengso a ruahmanna a lo siam sak thinnaah College-a thawktute chuan lawmthu an sawi bawk a ni.