1152/2023-2024

Aizawl the 17th July, 2023 : MLA General Election, 2023 inbuatsaihna atan vawiin khan DC Office, Aizawl-ah Demonstration Mobile Van chu Dr. Lalhriatzuali Ralte, IAS, Deputy Commissioner, Aizawl chuan a vailiam. He Demonstration Mobile Van hi Election Commission of India duhdanin EVM/VVPAT hman dan te mipuite hnena a tam thei anga hrilhhriat a nih theih nana ruahman a nih thu a sawi a ni.

He Demonstration Mobile Van hi Aizawl District chhunga Assembly Constituency tina polling station location zawng zawnga kal kual tura ruahman a ni a, tun dinhmunah motor 1 chauh ruahman phawt niin hei aia tam hi a tul anga ruahman belh zel tum a ni. He Demonstration Mobile Van hi inthlan puan hma chu kalpui tur a ni a. Hei hian a tum ber chu inthlanni a vote thlak chungchangah mipuite an buai loh nan inhrilhhriatna atan leh vote thlak dan lo inzir chhinna atana ruahman a ni.