1151/2023-2024

Champhai, the 17th July, 2023: Vawiin chawhma khan Environment, Forest & Climate Change (EF&CC) Minister Pu T.J. Lalnuntluanga chuan Champhai Tlangsam Dumpui tlanga Satellite Wildlife Rescue Centre dinna tur hmunhma leh a panna tur kawngte tlawhin a enfiah.

EF&CC Minister Pu T.J. Lalnuntluanga chuan ramri depa awm Champhai District kaltlangin dan lova nungcha tawlhruk thahnem tak man a nih tawh thu sawiin, Central Zoo Authority of India inkaihhruaina dan siamin sahuan pangngaia dahluh mai a remti lova, hemi a nih avang hian Court rorelna leh Enforcement Agencies dangte'n nungcha tawlhruk an mante chu dah maina tur a awm loh avangin an awmna tur bik Wildlife Rescue Centre din tuma hmalak a ni, a ti a. Champhai Tlangsam Dumpui tlanga Satellite Wildlife Rescue Centre dinna tur project siamte sawrkar laipuiin a pawm tawh thu tarlangin, financial sanction pek thuai a nih theih nan Ministry lamin August thla tirah Technical Committee paltlang tura chhawpchhuah an tum thu a sawi bawk.

Tunhnaiah ramri kaltlanga nungcha tawlhruk man a ni fo mai a. Ramri kaltlanga nungcha tawlhruk emaw, ram chhunga dan lova nungcha kawl leh tawlh mante dahna tur leh enkawlna tur Satellite Wildlife Rescue Centre dinna tur hian Tlangsam khaw bul Forest Department hnuaia awm Dumpui tlang ram hectare 20 vela zau chu ruahman a ni a. A panna tur kawng Tek den kawn, Tlangsam atanga siam turte pawh vawiin vek khan enfiah nghal a ni bawk.

EF&CC Minister Pu T.J. Lalnuntluanga hi Pu Lalduhthlana DFO Champhai, Dr. Lallawmkima DIPRO Champhai, Pu Lallianmawia, JE, PWD Champhai, Forest Department Staff-te leh khawtlang hruaitute'n an tawiawm a ni.