586/2025-2026
Aizawl the 14th May, 2025 : Aizawl District chhunga chhiatna thleng thei tihnep nan leh pumpelh nan Aizawl District Commissioner Er. Lalhriatpuia, Chairman, Aizawl District Disaster Management Authority chuan DM Act, 2005 Section 30 (xxix) leh Section 34 (m) in a thuneihna a pek angin a hnuaia thuchhuahte hi zawm theuh turin mipuite min hriattir.
Heng thuchhuah zawm lo te chu DM Act, 2005 Section 51 (b) hmangin hrem theih an ni ang.
1. AMC area chhunga in, office, playground, vantlang zunin sa tur te chuan Site Development & Slope Modification (SD&SM) hnuaiah AMC ah phalna la in, a hmunhma 45 degree aia awih ah chuan Slope Stability Analysis report an nei ngei ngei tur a ni. Report ah hian a hnuaia tarlan te hi a tel tur a ni:
- Plasticity index
- Direct Shear Test
- Standard Proctor Compaction Test
- Soil Bearing Capacity
- Specific Gravity
- Porosity.
2. AMC atanga Building Permit nei zawng zawng ten AMC a SD&SM Board in a Excavation Plan phalna an pek ang chauhin lei an lai tur a ni a, an geologist rawihin uluk takin a enpui ngei ngei tur a ni. Lung hal ngai a nih chuan Directorate of Geology & Mining a mithiam bik te ruaiin anmahni enpuina hnuaiah hna thawh tur a ni. Leilung thawl/ ngheh lohna hmunah chuan khawl lian leh nghawr na thei chi hman loh tur a ni.
3. Aizawl District chhunga AMC in a pek Building Permit nei zawng zawng ten tui khawlna tur tha tak an siam nghal tur a ni a, heihi a remchang lo anih pawhin tui luan kawr a luang lut tura ruahmanna siam tur a ni. Tin, Aizawl khawchhunga in nei ten tuichhe paihna mumal tak siamin, heng tuichhe paihna te hian Public drain a pawh ngei ngei tur a ni. Kawrpui hlata in neituten an tuichhe paihna kawrpui a in chhung thei turin Local Level Disaster Management Committee te nen a hma la in AMC Building Regulation Section-37 in a phalsak angin an thenawm te ram pal tlang pawha tui luan kawng siam phalsak tur a ni.Tuiluan kawr te hi uluk taka siamin, lei chhunga tui put awm lo tura siam tur a ni.
4. In thenawm hnaivai tuiluan kawr intawm ten ruahtui luanna tur tui luan kawr ruahtui dawng vek thei leh tha tawk tak an siam tur a ni.
5. Local Level Disaster Management Committee tin ten mahni veng chhung a lungrem a him tawk leh tawk loh enfiah tur a ni a. Him tawk loh a hriat te chu a rang lamin Local Level Disaster Management Committee ten Chairman, Aizawl District Disaster Management Authority hnenah report tur a ni.
6. Vawk leh ar vulh phalna nei ten an vawk in/ar in chhuat phahah RCC hmangin tray an siam tur a ni a. Heng a thli te hi tui luan kawr ah an paih ngei tur a ni.
7. Aizawl khawpui chhung leh khaw dai a Quarry nei ten Directorate of Geology & Mining atangin Mining/ Quarring Plan an nei ngei ngei tur a ni a, Plan ang hian hma an la tur a ni. A tlem thei ang ber lung hal tur a ni a, nghawr na lo thei ang tur leh a bulhnai leilung ti che tlem thei tur ang berin Engineer-te enpui na hnuaiah Scientific blasting hman tur a ni. Shotfirer License nei lo in tumah lung hal phal a ni lo.
8. Quarry a lung hal dawnin lung halna tur kua chu feet 6 a thuk, 8mm aia zau lo a ni tur a ni a, vawikhatah hmun 5 aia tam lo hal tur a ni. Quarry neitu ten mamawh chin chauh lung an la tur a ni a, vawikhatah hmun zau tak an hal tur a ni lo.
