334/2023-2024
Aizawl, the 4thMay 2023 : Aizawl DC chuan vawiin khan Manipur buaina chungchanga inhmakhua turin Local Council/Village Council Disaster Management Committee Chairman-te leh CYMA President te a ngen.
Ngenna ah hian Aizawl DC chuan Manipur state buaina a thlen mek avanga Mizorama mahni sahimna zawnga Zohnahthlak unaute rawn lut an awm thei thu tarlangin heng mite lo tuamhlawm thei tura ruahmanna lo siam a, lo inralring turin Local Council/Village Council Disaster Management Committee leh CYMA President te chu a ngen a. Chutiang mi lo lut an awm chuan LC/VC te chu heng mite chanchin kimchang tak lo chhinchhiah turin a hriattir a. CYMA President chu YMA Branch tina hruaitute an mahni veng hmunhma remchang (Hall leh adt.) te pawh a tul huna hman theih tura lo buatsaih turin Branch tin te lo hrilh hre turin a ngen bawk a ni.
Hetih rualin Mizoram chhunga cheng leh khawsa Manipur mi leh sa ten harsatna an tawh loh nan leh boruak tha lo zawk alo chhuah loh nan, VC/LC leh Branch tin te hruaitute chu member tin leh an veng mi leh sa te fimkhur tura lo in zirtir a, lo infuih turin a ngen bawk a. Hemi chungchanga zawhna leh harsatna nei te chuan District Emergency Operation Centre (DEOC) helpline no (1077) ah emaw bialtu Zonal Officer hnenah thlen thei anih thu Aizawl DC chuan a ngenna a tarlang bawk.
