333/2023-2024

Aizawl, 04.05.2023: Vawiin khan Planning and Programme Implementation Department buatsaihin State Investment Workshop chu Royale Lalawi Confernce Hall-ah buatsaih niin, Chief Minister Pu Zoramthanga leh DoNER Secretary Pu Lk Ranjan te'n an telpui a. He workshop hi Ministry of DoNER bultuma Mizorama investment workshop buatsaih hmasa ber a ni a, kumin August thla a North East Global Investors Summit 2023 neih tur atana India hmarchhak state -te buatsaihna ni pah fawmin state pawn atangin potential nvestor 13 an lo kal a ni.

Chief Minister chuan Mizoram chu hmasawnna tur theihna kawng hrang hranga a neih zia sawiin, tourism te, education te, hotel leh hospitality bakah agriculture lamah investment tih theihna remchang thahnem tak a awm thu a sawi a. Mizoramah chuan a chhunga chengte hneh taka chawmzo tur ram hman tangkai theih tam tak a la awm thu te, tui leh ruahtui duhthusawm, sik leh sa nuam, engkim deuh thaw tha taka tharchhuah theihna tur lei tha te chu a theihna ang taka tangkaia hman theih chuan rah duhawm tak a chhuah theih tur thu te sawiin, investor te tan kawng thui tak a inhawn thu a sawi a ni.

DoNER Secretary Pu Lok Ranjan chuan sawihona tha tak neih a ni chu lawmawm a ti a. Ministry of DoNER chuan Global Investors Summit lo awm turah India hmarchhak state ah sector hrang hranga sumdawnna leh eizawnna bultanna sum leh puihna tam zawk a luh a, hlawkna tam zawk haichhuah theih a nihzia pholan tum a nih thu a sawi a. Heng hmalakna te hi tum khat chuah neih a hlawhtling thei a nilo tih a hriatpui thu leh, sawrkar laipui chuan hmarchhak state ah investment tam zawk a awm zel theih nan hmalak a nih tur thu a sawi a.

Chief Secretary Pi Renu Sharma pawhin he hunah hian thu tawi sawiin, investor te chuan Mizoram chu zirchiangin investment hlawhtling tak an tih theih a rinawm thu a sawi a, Mizoram tan hlawkna lian zawk hmuhna tur bultanna chu he workshop hian a thlen a beisei thu a sawi.

He Workshop-ah hian chawhma lamah Invest India, FICCI te aiawh atangin presentation ngaihthlak a nih bakah state sawrkar hnuaia department hrang hrang (Tourism, LR&S, P&E, LESDE, C&I, Horticulture, ICT, Transport, Finance, Agriculture, H&FW, H&TE, SYS leh GAD Department) hotute nen sawihona neih a ni bawk a. Chawhnu hun hi Pu Lalmalsawma Pachuau, Planning & Programme Implementation Department Secretary chuan chawhnu hunah kalkhawmte lawmin Tourism Department, Commerce & Industries Department leh Horticulture Department atangin investment leh sumdawnna kawng inhawn dan te thusawi ngaihthlak a ni bawk. Prof. Laldinliana, Mizoram University kaihhruaiin industry aiawhte nen inkawmna neih a ni bawk a, Dr. Lalrinchhana, Principal Adviser & Nodal Officer for NEGIS, Planning & Prog. Implementation Department chuan lawmthu sawiin hun a khar a ni.

Hemi zawh hian DoNER Secretary hian thuthar thehdarhtute kawmna hun a hmang a. B2G & B2B Interaction a hun hman zui a ni.