Vawiin khan Aizawl DC Dr A Muthamma chuan Sanitation campaign 2018 Khatla kawnah hawnna hun a hmang a, Pu Alan Lalthanzara, Asst Commissioner in he hun hi kaihruaiin Addl DC Pu John LT Sanga, AMC Secretary Pu David Lalrinawma leh Khatla Local Council leh NGO hrang hrang hruaituten he hun hi an telpui.

Aizawl DC Dr A Muthamma chuan, Sanitation Campaign 2018 hian Aizawl khawpui tan Faina kawngah nghawng tha a neih ngei ka beisei a, kan tui kawng leh luikawrte fai zawk a kan enkawl theih nan he Campaign hi hman I tum theuh ang u, a ti a, Sanitation Campaign hi faina kawnga kan thawh ho nan hmanraw tangkai takah I hmang ang u, a ti bawk.

Addl DC Pu John LT Sanga chuan kan veng leh a chhehvelte mai bakah kan luikawrte tihfai hi kan mawhphurna a ni a, hmasawn leh changkan kan duh chuan fai hmasak angai a ni, a ti a, Sanitation campaign chhunga Local council hrang hranga hmalakna kalpui tum te hi neitu thinlung pu chungin I kalpui ang u, a ti bawk.

Khatla Local Council Chairman Pu Ramliana Ralte chuan Sanitation campaign 2018 buatsaih a ni chu lawmawm a tih thu sawiin, faina kawngah hma an sawn ngei a beisei thu a sawi a, campaign chu tangkai taka kalpui an tum thu a sawi bawk.

Mizoram sawrkar flagship programme NEDP hnuaiah UD&PA department kaltlangin Aizawl DC in Sanitation Campaign 2018 hi  a buatsaih a, Sanitation campaign chhung hian kan tui hna, luikawr leh luikam te tifai a hun hman tum a ni. Aizawl khawpui chhung a Local Council hruaitute nen thawk hovin Tlawng leh Chite lui fintu luikawr tam zawk luanna Vengah te Sanitation campaign hi nasa zawk a kalpui a ni ang. Sanitation Campaign 2018 ah hian Local Council 26 te bakah Lengpui, Darlawn, Saitual leh Sairang ah te faina kawnga hmalakna kalpui tura ruahmanna siam a ni.