138/2025-2026

Aizawl dated 11th April 2025: Vawiin chawhma khan DC Conference Hall, Aizawlah thlai thar state pawn a hralh chhuah kawnga hmathatna awmte leh hriattur pawimawh inzirtirna hun 'Capacity Building on the Role of APEDA in Export Promotion of Agricultural and Horticultural Products, Financial Assistance Schemes of APEDA' chu Aizawl DC Office leh APEDA tangkawpin an buatsaih.

He hun hi Pu Zoramsiama Hmar, Additional Deputy Commissioner, Aizawl District chuan kaihruaiin, Er Lalhriatpuia, Deputy Commissioner chuan kalkhawmte lawmna thu a sawi a. Kuthnathawktute thlai thar thawnchhuak tur a sawngbawl kawnga hmasawnna tehfunga a lan danin Mizoram chu NITI Ayog Export Preparedness Index ah 36 zingah 35-na ah a awm mek thu sawiin hei hian kan thei leh thlai tharte leh heng atanga siamchhuah thil chi hrang hrangte hralhchhuah kawngah nasa taka hmalak a tul zia a lantir thu a sawi a. APEDA te chuan heng kan thei leh thlai thar hralh chhuah kawngah nasa taka puihna min pek tur thu tarlangin lawmthu a sawi a. Heng hmalakna tihlawhtling tur hian department hrang hranga thawktute, entrepreneurs, Farmers Producers Organisation-te leh pawl hrang hrangte thawhhona a pawimawh thu a sawi bawk a ni.

Training hi Mr. Joydev Roy, Business Development Manager, APEDA, Tripura in a pe a. He programme ah hian Horticulture Department-a thawktute, Mizoram State Rural Livelihood Mission, Farmers Producers Organisation-te leh entrepeneurs hrang hrangte an tel a ni.