137/2025-2026

Khawzawl, dated 11th April 2025: Vawiin chawhma dar 10:30 khan Zaingen YMA Hall-ah DC Office hmalaknain Khawzawl District a Village Council (VC) hruaitute leh YMA Branch hruaitute tan Khawzawl District Khawtlang Hruaitute Intawhkhawm Runpui neih a ni a, Deputy Govt. Chief Whip leh Tuichang bialtu MLA ni bawk Pu W. Chhuanawma chuan khuallian niin he hun hi a hawng a ni a.

Khuallian Pu W. Chhuanawma chuan thu sawiin kalkhawm te hnenah zahna chibai a buk a, he hun tha tak DC Office hmalakna zara a thleng thei hi tha a ti hle tih a sawi a, hun dangdai tak, tangkai thei tak a nih ngei a beisei thu a sawi. Dan hriat a pawimawh a, lehkha chhiar tam te hi a tangkai hle a ni tih a sawi a, khawtlang hruaitute he huna an thil zir leh thil hriat thar te vawng thaa mipui tana hmang tangkai turin a chah bawk. Thil hriatloh hi pawi a ni lo a, hriat tum loh erawh a pawi hle a ni tih sawiin zawhna zawt hreh lova thiam zawk leh hre zawk rawn hreh ngai lo turin a chah. Hun hi mi tin tan a kal dan a inang reng a, kan hun neih kan hman danah hian teh kan ni thin a ni tih a sawi a, kan hun hlu tak hi hmang tangkai thiam turin a chah a ni. A tawpah khawtlang hruaitute hnenah an lo tel theih avangin lawmthu a sawi a, hlawk taka hun hmang turin duhsakna hlan a ni. Khuallian Pu W. Chhuanawma hian DC Office lehkhabu siam "Khawzawl District Chanchin" tih a tlangzarh bawk a, khawtlang tana tangkai leh hlutawm tak a nih ngei a beisei thu a sawi a ni. He lehkhabuah hian Khawzawl District a veng leh khaw hrang hrang hman atang tawha chanchin an neih te leh khaw chinchang chhut chhuah a ni.

Intawhkhawm runpui hi hun hniha then niin Addl. DC Pu Lalfakzuala'n a kaihruai a ni. Hun khatnaah hian Khawzawl DC Pu K. Vanlalthiana'n thu sawiin khuallian leh khawtlang hruaitute chibai bukin a lo lawm a, mahni nihna inhriatchian a pawimawh em em thu sawiin Khawzawl district hma a sawn zel theih nan mahni mimal nuna hma kan sawn phawt a tul a ni tiin a fuih a ni. Hun khatna khar nan SDO (Sadar) Pu Suvigya S. Chandra, IAS chuan lawmthu sawina hun a hmang a ni.

Hun hnihnaah hian sawrkar office hotu hrang hrang te'n khawtlang hruaitu kalkhawm te hnenah thu sawiin zirtirna an pe a, YMA lamin ruihhlo do chungchang inhrilhhriatna an nei bawk. He hunah hian department hrang hrang hnuaia hmalakna te, hamthatna awm te, hnathawh kal mek te leh hruaitute hriat tul hrang hrang kim taka sawi chhuah a ni a, VC leh YMA te'n thil pawimawh tak tak an zir chhuak a ni. "Khawzawl District Chanchin" lehkhabu VC tin hnena sem a ni a, hemi rual hian DC Office siam Khawzawl District Information - cum - Grievance Redressal System, 2025 tih booklet sem tel a ni. He lehkhabuah hian Khawzawl district a office hrang hranga thawktute hming leh nihna te, an hnathawh te leh anmahni biak theihna phone number dah a ni.

He intawhkhawmah hian kim takin VC President leh Secretary te, YMA hruaitute leh office hrang hrang hotute an tel a ni.