Vawiin khan Aizawl DC Pisa, Conference Hall ah Additional DC Pu V.L. Hruaizela hovin Aizawl DC office-a officer-te leh Republic Day lawman a chanvo leh mawhphurna nei Department aiawhten Republic Day vawi-70 na, January ni 26 lawm dan tur ruahmanna lo duan lawilawk tawh te thilirin meeting an nei.

Additional DC Pu V.L. Hruaizela chuan Republic Day lawmna hi kum tina kan tih thin, kan hna leh mawhphurna a ni a, kalphung pangngai leh tih dan felfai tak neiin he ni lawmna chungchang hi kan buatsaih thin a, kumin pawh hian kan chanvo leh mawhphurna neihte tha  takin kan hlenchhuah leh ngei turah ngaiin chumi atan theitawp chhuah turin ka sawm che u a ni, a ti a. Kum danga zing dar 9:00 AM a he ni lawmna Lammual a Larsapa hova hman thin chu tih danglamin kuminah chuan Republic Day lawmna hi zing dar 8:00AM ah Lammual ah tan anih tur thu a sawi bawk.    

Meeting ah hian hemi chungchanga meeting hmasa, December ni 21 ah thutkhawmna a thu rel bawhzui dante thlir ho a ni a, chipchiar takin he thil a Department hrang hrang tih tur, leh an chanvo leh mawhphurna te chu sawiho a ni a, Ceremonial Parade, Practice neih dan tur chungchang te, parade-a tel tur naupang tur hriselna dinhmun enchian chungchangte leh thil tul dangte chungchanga ruahmanna siam nghal a ni. Parade Pratice hi January ni 21 atang tan anih thei nan meeting ah hian ruahmanna siam a ni bawk.

Ruahman lawk dan chuan kumin Republic Day Ceremonial Parade ah School Contingent 14; Armed Contingent 11; NCC Contingent 3; Scouts & Guides Contingent 1 ve ve te; Ex-servicemen Contingent leh Band Party 3 beisei an ni. Armed Contingent ah hian Paramilitary forces – Assam Rifles, BSF leh CRPF contingent te pawh lam tura beisei an ni.