Tunlai hian hmun hrang hrangah intihhlim nan lehkhachaih an chaih nasa hle a, lehkhachaih chaih nana nylon emaw la (string) tih hriam chi reng reng hman hian sava, nungcha leh mihring tan harsatna a siam mai ni lovin, ram a tichhe theiin mi zawng zawng tan a pawi thei a. Hmun thenkhat Delhi, Pune leh Mumbai-ah te phei chuan mihring leh nungchaten hliam an tuarin an thih phah hial a ni. Tin, heng nylon la an hman thinte hi a tawih theih loh avangin leilung nasa takin a tichhe thei a ni.

Chuvangin hemi chungchanga National Green Tribunal thutlukna bawhzui tura Mizoram sorkar Environment, Forest & Climate Change Department lehkha No.C-18014/256/2017-FST Dt.27.2 2020-in a hriattir angin Aizawl Deputy Commissioner Pu Vanlalngaihsaka, IAS chuan vawiin ni 2.3.2020 khan a hnuaia mi ang hian Thupek a chhuah a ni :

Mihring leh ran hriselna atan a pawi theih avangin mi tumahin lehkhachaih nan nylon emaw la (string) tih hriam chi reng reng an hmang tur a ni lo. Lehkhachaih chaih nan khawlla (cotton) pangngai chauh an hmang tur a ni. Hetiang lehkhachaih siam danglam hi siam, hman, lei, hralh leh dah that khap a ni.

Thupek zawm lova bawhchhiate chu Section 188 IPC hmangin hrem an ni ang.