Nizan dar 7:00 - 8:00 inkar khan National Commission for Women, New Delhi bul tumin India ram State hrang hrangah Power Walk neih a ni a, He hun hmang tur hian Mizoram State Commission for Women pawh a inbuatsaih a; amaherawh chu National Commission for Women-in neih hun tura a ruat hi Pathianni a nih avangin Mizoram State Commission for Women chuan a zawm ve thei lova, Chairperson hmalakna-in a hun sawnsak tura dil a ni a, National Commission for Women chuan lo pawmsakin Mizoram-ah chuan Ni 2 March, 2020 (Thawhtanni)-ah zan dar 7:00 - 8:00-ah Power Walk hi neih a ni ta a ni.

Power Walk kawngzawh hi National Commission for Women-in a huaihawtna chhan chu hmeichhiate dikna leh chanvo humhalhna atana hmalakna pakhat a ni a. Kan khawpui kawtthler te hi hmeichhia awmnem zawk tana him lo a awm fo thin a. Chuvangin kan kawtthler te hi mipa tan chauh ni lovin hmeichhiate tan pawh a ni a, khawthim hnuah hmeichhiate pawhin thlamuang taka zawh ngam a nih theihna turin hmeichhia-in auchhuahpui se an ti a ni. Eizawnna avangin hmeichhiate pawh zan lamah chhuah a tul fo tawh a, ngaihngam tak leh thlamuang taka kan khawpui kawtthler te hmeichhiate tana hmun ralmuang a nih theihna tura aw chhuahna kawngzawh a ni.

Power Walk kawngzawh hawnna hi Most Rev. Stephen Rotluanga, Bishop of Aizawl-in Millenium Centre-ah Pathian hnena hlanna neiin kawngzawh tan a ni a, a tawp kharna pawh Vanapa Hall kawtah malsawm tawngtaina-in a tin nghal bawk a ni.

Mizoram State Commission for Women chuan Power Walk kawngzawhna a hlawhtlin theih nana phalna petu D.C. Aizawl District; S.P. Aizawl District; S.P., Traffic, Aizawl te chungah lawmthu a sawi a. Hemi bakah hian hmeichhe NGO te, Institution te leh mimal thahnemngaihna avanga tel zawng zawngte chungah lawmthu a sawi tak meuh meuh a ni.