2302/2023-2024

Aizawl, 13th October, 2023 : State Assembly inthlanna tluang tak leh felfai taka neih a nih theih nan  Aizawl District Level Standing Committee(DLSC)  chu vawiin khan Chairman Pi Nazuk Kumar, Aizawl District Election Officer(DEO) hovin DC conference hall ah a vawi khatna atan an țhukhawm a. Sawrkar department pawimawh aiawhte, political party aiawh te, Mizoram Journalist Association te, MPF leh tlawmngai pawl hrang hrang te, Local Council Association aiawhte leh Village Council Association aiawhte an tel a ni.

Pi Nazuk Kumar chuan Mizoramah   inthlanna felfai tak neih a ni țhin chu mipui ten dan leh thupek an ngaih pawimawhna avang te, MPF te hmalakna avang te a ni tih sawiin tun țum State Legislative Assembly inthlanna pawh tluang taka kalpui a nih theih nan Standing Committee member te chu an mawhphurhnate a sawipui a. Inthlan boruak vuakvetah kawng hrang hranga dan leh thupek bawhchhiatna leh buaina lian a thlen lohna turin theihtawp chhuah țheuh turin a ngen a ni.

Boruak țha tak hnuaiah mipui tam thei ang berin vote an thlak theih na turin Pi Nazuk Kumar chuan sawrkar department hrang hrangte chu an ruahmanna siam dan turte sawipuiin an mawhphurhna te țha taka hlen turin a chah a. Political party hrang hrangte pawh vantlang hmun pawimawhah te banner, poster leh party flag te tar tawh lo turin a hriattir a. MPF leh sawrkar department țhenkhat te chu a țul dan angin a hrana meeting neihpui leh turin a ti bawk a ni.