2804/2023-2024

Vawiin khan District Institute of Education & Training (DIET) Aizawl chuan an Auditorium-ah Platinum Jubilee an lawm a, School Education Secretary Dr Lalzirmawia Chhangte chuan khuallian niin a hmanpui.

Secretary Dr Lalzirmawia Chhangte chuan he Jubilee lawmnaah hian thusawiin DIET Aizawl-in kum 70 a tling ta chu a lawmpui thu a sawi a. Kan education system hi kan ram darthlalang a nih a vangin zirtirtute hian mawhphurhna sang tak an nei a, hna dang hmuh loh avanga zirtirtu hna thawk ve ringawt, hlawh lakna tur chauha a run dala thawk satliah an awm anih chuan chung zirtirtute chu kan ram leh hnam hmelma diktak an ni a ti. Teacher trainees te chu an training hun laia an zir te an thawhna sikul țheuhah a taka hmang chhunzawm turin a chah a. Thingtlang sikula thawkte pawhin teaching aids/resources te duhthusam a awm remchang lo a nih pawhin resource awm ang angte hmang țangkai thiam thei tura an in buatsaih a pawimawh hle a ni a ti. DIET a thawk zirtirtute chu Mizoram hma lam awm dan hriltu an ni thei tih hrilhin kan education system-ah hian thui tak mawh an phur a. Zirtirtute zirtir lehchhawngtu an nih avangin an dinhmun hi a pawimawh hle a ni a ti.

Secretary chuan Quality Education tak tak nei thei tura pawimawh hmasa ber chu zirtirtu, a hna zawng zawng a in pe hi a ni a ti a. Chutiang zirtirtu chher chhuaktu ni thei tura tan la sauh sauh turin DIET a thawk te chu a fuih a ni.

DIET Platinum Jubilee lawmnaah hian Guest of Honour School Education Director Pu Lalsangliana MCS leh SCERT Director Pi Zohmingliani te pawhin thu an sawi a. Pu Lalsangliana MCS chuan DIET pawimawhna sawiin mihring lo piang chhuak hmantlaka chher chhuaktu zirtirtu chhertu a nihna hi a hlu hle a ni a ti a. Zirna hian mihring nun laipui pawimawh tak a luah a, chuta a laimu chu DIET hi a ni a ti a. DIET kum 70 zet a nih takah chuan he hmun ațang hian eng ang service nge kan pek chhuah tih inenfiah a duh thu a sawi.

Pi Zohmingliani Director SCERT pawhin thu a sawi a, DIET hmasawn dan chu a fakawm a, Primary zirtirtu training-na atana din kha B.Ed zirna petu a ni thei ta hial a, a lawmawm hle a ni a ti.

DIET Aizawl-ah hian zirlai D.El.Ed - 237, B.Ed -99 an vaiin 336 thawktu teaching faculty -38 leh Non-teaching - 19, an vaiin 57 an awm mek a ni.

DIET Platinum Jubilee lawmnaah hian thawktu leh zirlai te, DIET a lo thawk tawh Principal leh lecturer te, School Education officer te, MBSE, SCERT leh Samagra officer te an tel a ni.