2803/2023-2024

Vawiin November ni 17, 2023 (Zirtawpni) chawhma dar 10:00am khan Mizoram sorkarin Mizo țawng hmasawnna leh humhalhna kawnga hma la tura a din, Mizo Language Development Board (MLDB) țhutkhawm hmasaber chu an Chairman, Pu R. Lallianzuala hovin Directorate of School Education Committee Room, Treasury Square, Aizawlah neih a ni.

Meeting kaihruaitu MLDB Chairman chuan Mizo țawngin hma a sawn zelna tur leh awmze nei zawka humhalh a nih theih nana MLDB din a lo ni ta chu Mizoram leh Mizo mipuite tan a hlut thu a sawi a. "Hun lo kal zel tur atan mellung pawimawh leh chhinchhiah tlak tak Mizoram sorkar in a phun a ni," a ti. He Board din tura Mizoram sorkar hmalakna hrang hrang te chhuanawm a tih thu tarlangin, khawvel hmasawnna țhang chho zelah kan țawngin hma a sawn ve zel a ngai a, chumi rual chiah chuan nasa lehzuala kan țawng humhalh tura hmalak a ngaih thu a sawi bawk.

Vawiin țhutkhawmah hian MLDB member leh sawm bik (co-optd member) te an kal țha hle a. Thurel pawimawh zual zingah Mizo țawngin hma a sawn zel theih nana tinzawn bik neia hma la tu tur sub nan committee hrang hrang siam te leh Mizo A AW B (Orthography) siam rem chungchang te, MINECO huamchhunga MLDB office hmun tur sorkar-ah dil chungchang te a tel a. Tuna Mizo A AW B kan hman meka 'NG' awmna hmun hi tihdanglam a, 'N' dawtah, '0' hmaah awm se a tha em tih te uluk taka ngaihtuah a ni bawk. Meeting vawi 2-na chu kum 2024 kumtir lamah neih leh tura ruahman a ni. Meeting hmasa berah hian Co-opted members Prof. C. Vanlalhruaia, leh Dr. R. Zothanliana te an tel bawk.

Mizoram sorkar chuan September ni 29, 2023 khan thuneihna sang tak nei, Mizo Language Development Board member turte kum 3 chhung atan a ruat fel a. Chung te chu-

1. Chairman : Pu R. Lallianzuala, Chanmari, Aizawl
2. Secretary : Pu Vanlalțanpuia, MCS, Bungkawn Veng, Aizawl
3. Members : 
  1. Prof. R.L. Thanmawia, Ramhlun South, Aizawl
  2. Prof. Rualkhuma Colney, Republic Vengthlang, Aizawl
  3. Pu Rozama Chawngthu, Mission Vengthlang, Aizawl
  4. Pu H. Ngurthansanga, Mission Vengthlang, Aizawl
  5. Prof. Laltluangliana Khiangte, Mission Veng, Aizawl
  6. Pu B. Lalhmunliana, Bethlehem Vengthlang, Aizawl
  7. Pu Lalzarzova Khiangte, Mission Veng, Aizawl
4. Ex-Officio Members : 
     1. Chairman, MBSE, Aizawl
     2. Director, SCERT, Mizoram
     3. Director, Art & Culture, Mizoram

MLDB din a nih theih nan hian Mizo Language Development Board (MLDB) Bill, 2022 chu Ni 10.3.2022 ah Mizoram State Legislative Assembly chuan a pass a, Mizoram Governor in Ni 15.3.2022-ah pawmpuina hming ziah hnanin, Mizoram Gazette-ah March ni 29, 2022 khan Mizo Language Development Board Act, 2022 chu hman theih tura tihchhuah (publish) a lo ni ta a ni.


Dt.6.2.2023 khan MLDB Office thar luahluhna leh hlanna hun hman a ni a, tunah hian All India Service Transit Building - 2, MINECO a mi chu Office atan luah mek a ni. School Education Department, Government of Mizoram chuan Notification vide No.F.23015/1 /2022-EDN dated 26.9.2023 tichhuakin, kum 3 (kum thum) chhung atan Mizo Language Development Board member te a chung a mi ang khian a ruat. MLDB meeting hmasa ber vawiin Dt. 17.11.2023 hian koh a ni a. He hunah hian Co-opted members pahnih- Prof. Vanlalhruaia, President, Mizo Language 6t Literature Teachesr Association leh Dr. R. Zothanliana, Assistant Professor, Department of Education, Mizoram University te sawm an ni bawk.

Attachment

  • Loading attachment...