2872/2022-2023
Aizawl, 30th November, 2022 : “Swachhata Hi Seva” (September 15, 2022 – October 2, 2022) denchhena buatsaih Aizawl District-a khaw fai thlanna result chu vawiin khan PHED Conference Hall, E-in-C office building, Tuikual South-ah puan a ni a. He hun hi Aizawl district bawrhsap Dr Lalhriatzuali Ralte, Chairman, DWSM, Aizawl district in a hmanpui a ni.

Khawfai thlanchhuahte chu pakhatna – Maubuang, pahnihna – Sailam, pathumna – Sailutar an ni a. Sawleng leh Muthi ten consolation prize an dawng a, lawmman atan hian chawimawina thuziak leh sumfai hlan an ni.

He huna thusawitu Dr Lalhriatzuali chuan hman khat daih plastic (single use plastic) khap a nih tawh thu leh sawrkar laipui lam atanga kengkawhtu National Green Tribunal an khauh sawt thu sawiin, tih tur an rawn tukte kan zawm that a ngai tawh hle a, uluk taka min vil zui reng avangin a zawm tha lo state te chu an hrem thin a, he hman khat daih plastic hi kan ram leilung tan a that loh bawk si avangin keini hian kan hman loh mai piah lamah midangte hrilh hria a zirtirtu kan nih a ngai a ni, a ti a. Krismas leh kumthar ruai buaipuitute pawhin hei hi ngai pawimawh a, a thlakna tur kan ngaihtuah a ngai a ni, a ti.

Fai tur chuan tui kan hnianghnar a ngai tih sawiin bawrhsap chuan tuihna humhalh leh tui rencham kan tih a ngai a, a theih ang anga mipuite hnena ziritirna uar lehzual a tul a ni a ti a. Ei leh in sawngbawl kawngahte pawh thianghlim kan zir thar zel a tul thu a sawi bawk.

Pu H. Duhkima, Director PMU, PHED pawhin thu sawiin fai hi a pawimawhzia leh fai tura kan tih turte midangte zirtir thei turin mahni kan fai a tul a ni, a ti a. Inchhunga kan faina hian khawlai thleng se, inchhung kan tihfai uluk ang bawkin khawlai tibawlhhlawhtu nih loh i tum theuh ang u tiin kalkhawmte a chah a ni.