2871/2022-2023
Mamit 30th November,2022 : Vawiin khan Er. H. Lalzirliana, Mamit Bialtu MLA/ Vice Chairman, Road & Infrastructure Development Board chuan Bawngva khuaah Mini Sadbhav Mandav (Multipurpose Community Centre) chu khuallian niin a hawng. 

Bialtu MLA chuan Bawngva khua chu Sawrkar hmasawnna-in a thlen nasat berte zing a mi niin, Bawngva khaw tana hmasawnna chu hmu thiam turin khawtlang mipuite a chah a, Multipurpose Community Centre changtlung tha tak mai khawtlangin an nei ta chu enkawl dan thiam tur leh a chhiat a thatah pawh khawtlang mipui mawh a nih dawn thu a sawi bawk.

Bialtu MLA chuan Mamit District, Aspirational District kan nihna chu a hming mawilo viau thin mahse Sawrkar laipui atangin malsawmna leh duhsakna tam tak kan dawng a, chung hmasawnna-in a kal kan loh zingah chuan Bawngva khua hi kan tel a ni tiin heng hmasawnna hrang hrangte hian kan khawsak leh nundan phungah rah tha a chhuah tur a ni a ti. Mizoram Flagship Programme SEDP, Sawrkar-in hrileng leh hun harsa tak kara a tihlawhtling hram hram chu thil lawmawm tak a nih thu a sawi bawk.

Bialtu MLA hian Bawngva khawtlang mamawh chi hrang hrang Silpauline, thingpui no, Dekchi, , Football, Volleyball, Jersey leh thildangte a hlan nghal bawk a ni.

Bawngva Multipurpose Community Centre hi NITI Aayog atanga sak niin a dung 20 m leh avang 10 m a ni a, a san zawng hi 5.4 m niin cheng nuai 50 sen ral a ni. 

Multipurpose Community Centre hawnna hi Ngulzathuama, BDO Zawlnuam chuan kaihruaiin, he hunah hian Pu HD Lalpekmawia, Project Director, DRDO leh Pu Laldingliana, DEO Mamit te'n thu an sawi a. Pu Lalramthara VCP Bawngva-in lawmthu sawina a nei bawk.

Community Hall hawnna-ah hian Bawngva khaw mipuite leh Mamit atangin Sawrkar Officials te leh khawtlang hruaitute an tel a ni.

Bialtu MLA hian tunkar chho hian a bialchhung khua Suarhliap, Damdiai, Phaizau, Vawngawnzo te a tlawh chhunzawm ang.