Vawiin chawhma dar 11:00 khan DC Office Chamber-ah Additional Deputy Commissioner, Pi Angela Zothanpuii hovin Aizawl District-a Teachers’ Day 2013 hman dan tur leh National Foundation for Teachers’ Welfare atana sum tuak dan tur te ngaihtuahin an thukhawm.
He meeting-ah hian kumin Teachers’ Day chu Aizawl khawpui chhunga sikul hrang hrang ten zingkarah Rally neiin, anmahni sikul theuh atanga chhuakkhawmin, zing dar 7:00 ah Sipai Lammualah intawhkhawm ni se, an ti a. Hetah hian Education Minister Pu Lalsawta hovin National leh State Teacher Awardee-te nena hun hman tura ruahhman niin, chawhnu lam erawh anmahni sikul theuhah an remchan angin an hmang dawn a ni. District chhunga Sub Division-te chu chan insemin hmun remchang laiah “Teachers’ Day” banner tar tura ruat an ni a, SDEO Saitual leh SDEO Darlawn te chu anmahni remchan anga he hun an hman dan tur ruahhman tura tih an ni bawk.
Kumin hian Aizawl District chu National Foundation for Teachers’ Welfare Fund atan Rs.8,00,000 tlin tura beisei an ni a, hei hi tihhlawhtlin ngei tum a ni. Hemi atan hian Ball Pen leh Key chain te zirna in hrang hrangah zawrh tum a ni a, heng atanga sum hmuhte hi zirtirtu sawrkar sikul ami chauh lo pawh, natna khirh leh harsatna tawkte tanpuina tura tih a nih avangin thahnemngai taka leisak tura ngen nise, an ti bawk.
