Vawiin khan Pu S. Laldingliana, Parliamentary Secretary chuan Lunglei Salem Veng-a Community Centre sak tur lungphum a phum.
Pu S. Laldingliana chuan he Community Centre hi Integrated Housing & Slum Development Programme (IHSDP) hnuaia Scheme pakhat niin Lunglei-ah hian hmun 3-ah hetiang hi sak tum a nih thu leh chung zingah Salem Veng-in he Scheme an chang ve thei chu lawmawm hle a ni, a ti. Mizoram sawrkar chuan hmasawnna chak takin a kalpui zel a, Community Centre din tur te chu mipuite tan tangkai thei ang bera hman ngei a nih a beisei thu a sawi.
He Community Centre Lungphum phumna inkhawm tawi, Salem Veng YMA Hall-a neih hi Salem Veng YMA President Pu P. Vanchhunga-in kaihruai a. Pu R.L. Zidinga, DUDO in Community Centre sak dan tur report a pe a. Hall hi a dung feet 64, a vang feet 36 a sak tur a ni a, Cheng 32,59,244 sengin thla 12 chhunga sak zawh tura beisei a ni.
