2187/2025-2026

Aizawl dated 13th November 2025: Vawiin khan Aizawl DC Conference Hall-ah Aizawl District Agriculture Marketing Committee (DAMC) chuan thutkhawmna an nei a. Er. Lalhriatpuia, Deputy Commissioner chuan thutkhawm hi kaihruaiin thurel hrang hrang zingah, Sawhthing hralh hna felfai leh sawt zawka kalpui a nih theih nan Chamring leh Zuangtuiah Secondary Collection Centre din belh nise, tiha rel a ni.

Vawiin Aizawl District Agriculture Marketing Committee thutkhawmnaah hian Aizawl district chhunga Rural Development Block hrang hranga Sawhthing lei leh hralhna hmanpui, Secondary Collection Centre (SCC) dinhmun thlirletna hun neih a ni a. E. Phaileng, Thingsul, Aibawk leh Sairanga Sawhthing lei leh hralh chhuah dinhmun thlirletna atangin Sairang SCC chu thiah a, Zuangtuiah SCC din belh leh Aibawk SCC chhawk zangkhai turin Chamringah SCC din bel tura hmalak a tul thu tarlan a ni. Felfai leh mumal zawka SCC kalpui a nih theih nan SCC enkawl tur thlan chhuahna kawngah Sawhthing thar chhuak tam khuate chu nasa zawka inhmang lehzual tura ruahman ni se, tih rel a ni bawk.

Mizoram Agricultural Marketing Board (MAMB) ruahmanna angin DAMC thutkhawmnaah hian, SCC hruaitute tha tichak tur leh puitu tur, Sawrkar hnathawk lai atangin SCC Supervisor ruat dan tur rel nghal a ni a. Supervisor mawhphurhna leh an hnathawh dan turte sawiho a ni.