Vawiin khan Industries Department hnuaia NLUP tanpuina 2nd installment chu Aizawl East-I bial tan Thuampui Community Hall-ah sem a ni a. Veng 11 Local Council/Village Council hruaitute kutah bialtu MLA Pu R.Lalrinawma, Mizoram Law Commission Chairman-in a hlan a ni.
Tanpuina dawngtute fuihna thu sawiin Pu Rinawma chuan NLUP chu Mizoram sorkar project pawimawh ber a ni a, mirethei te tan hei anga scheme tha hi khawiah mah hmuh tur a awm lo, a ti a. NLUP ah chuan sorkar budget-ah mipui an tel a, a takin mipui kutah sorkar sum a lut a ni, a ti bawk. Pu Rinawma chuan rambuai hma in Mizo te chu hnam taima, midangte puih lova mahni intodelh tum tlat hnam kan ni thin a. Buai hnua Mizo nunphung leh rilru puthmang lo danglamah awlsam taka sum hmuh tuma vir reng kan tam ta hle a. NLUP dawngtu te chuan sorkar-ah tumah an biak tlawn leh vir buai ngai lovin tanpuina sum nuai 1 aia tlem lo an dawng hi an vannei hle a ni, a ti a. Tanpuina dawn an nghahhlelh tluk zetin sorkar-in a dawngtute hlawhtlinna hmel hmuh a nghakhlel ve, tiin Pu Rinawma chuan NLUP hmangin ‘kan hnam nunphung tlachhe mek hi i siam tha leh ang u,’ a ti a. . NLUP thawh khatna dawng tura sorkar duhsakna dawng hmasa tute chu midangte entawn tlaka hma hruai turin a chah a ni.
Vawiin a NLUP sem inkhawm hi Pu R.Selthuama, NLUP Implementing Board Chairman in a kaihruai a. Industries department hnuaia NLUP 2nd installment sem-ah a dawngtute koh khawm an nih chhan sawiin Pu Selthuama chuan Mizoram sorkar-in NLUP dawngtu ten hlawhtlin pui ngei se tih a duh vangin infuih leh inzirtir na atan NLUP semna hun chu hman tangkai a ni, a ti a. Tun hnaia Kolasib-a tanpuina dawngtu mi pakhat-in NLUP tanpuina bawng a hralh chungchang chu sorkar-in a la thutak hle a, FIR theh lutin thil tisualtu hi case siamsak a ni tih a sawi a. A bawng hralhna bakah tanpuina a lo dawn tawh te pawh sorkar-ah a pekkir a ngai dawn a ni, a ti. Aizawl District Monitoring Committee Chairman Lt.Col. Z.S.Zuala pawhin thu sawiin NLUP tanpuina dawngtute chu an hma lak dan ngun taka thlir zui an nih tur thu leh a nihna tur anga sum hmang lo te chungah dan anga thil kalpui loh theih a nih loh tur thu a sawi.
Vawiin-a NLUP sum pek chhuah nen hian Industries department hnuaia NLUP tanpuina 2nd installment chu Aizawl District -a NLUP Cluster 14 ah sem chhuah a ni ta a. Amaherawhchu hei hian trade thenkhat, a khawla tanpuina pek chhuah tur te a huam tel rih lo a ni. Tarlan tawh thin angin Industries department hnuaia NLUP thawh khatna ah hian a tirah beneficiaries 3200 tan cheng nuai 1100 ruahman a ni a. Benefiaciaries hi 10,678 laia an pun tak avangin sum ruahman pawh cheng nuai 9019 a tihpun a ni ta a. Aizawl District cluster 14-a 2nd installment sem ah hian cheng nuai 6230 vel sem chhuah a ni.
