Tukin zing dar 8:00 khan Foods, Civil Supply & Consumer Affairs leh E & F Department changtu Minister Pu H.Rohluna chuan Lungmual, Lunglei hmuna FCS &CA Godown leh Forest hovin an humhalh Aiting (Dancing Girl) awmna Lunglawn leh Theiriat ram te a tlawh a. Hemi hnu dar 10:30 leh 12:00 khan DCSO office leh DFO office te tlawh in DFO office ah thing a phun nghal ani.

Minister chuan FCS & CA Godown te chu Mizoram eibel leh buhfai dah thatna a nih avangin a sak pawh sorkarin a uluk ani a ti. Supply Deptt. sum zawng zawng deuhthaw buhfai leinan hman anih thin avang in Godown sak thar leh thuam that hi thil awlai a ni lova, a ven him leh enkawl uluk chungchang ah a awmna veng mipui te leh a thawktu te an pawimawh hle ani a ti. Minister chuan Godown lian deuh te a Weight Bridge an dah tawh te chu mimal enkawl tir reng an ni ang a ti. Minister hian dar 12:30 khan Pukpui, Lunglei hmun a E&F Department hmalak mek Forest Nursery a tlawh a. Mizoram sorkarin a nauban a neih hlu tak tak te leh hnim hnah hmun dang a awm ve zen zen lo te chu a humhalh thu a sawi a, Nauban chihrang hrang dah khawmna hmun (Orchidarium) changtlung tak neih atul thu leh chu chu sorkar pawh in a dah pawimawh thu a sawi ani.