1753/2022-2023
Aizawl 29th August 2022: Vawiin khan Aizawl District atan Family Oriented SEDP Launching Programme chu Assembly Conference Hall-ah hman a ni a. Rural Development leh I&PR Minister ni bawk Pu Lalruatkima chu khuallian a ni.

Khuallian Pu Lalruatkima chuan thu sawiin August ni 19 ah State pum huamin Chief Minister hova Family Oriented SEDP Programme hawn tawh a nih thu tarlangin, District thenkhatah hawnna an neih tawh thu sawiin, vawiin ni a Aizawl District atana hawn a ni chu lawmawm a tih thu a sawi a. Minister chuan sawrkar Flagship Programme hlawhtlin theihnana hmalatu leh ngaihtuahna seng tam tak te chungah lawmthu a sawi bawk a, Covid-19 in kan ram chauh ni lo khawvel a nuai lai pawha tlai ngai lo Pathian kan nei hi kan vannei a, zofate vanneihna chu lungthu pathum Kohhran, Tlawmngaipawl hrang hrang leh sawrkar kan nei hi a ni a ti a. Hetiang hi hmundang leh ram dangah hmuhtur a awm lo a ni a ti a. SEDP chu kuthnathawktute leh mahni a eizawnna hrang hrang nei te dinkhawchhuahna a lo nih theihnan leh lei rual rem an rah theih nana sawrkarin kawng a hawnsakna a ni a ti a. Beneficiary te hlawhtlinna chu an tumruhna leh hmathlir an neihna-ah a innghat tlat a ni a ti a, hlawhtling tum tlat te tan he khawvelah hlawhtlinna a awm a ni tih hria a, kan ngaihtuahna te pawh a tha lam hawi a, ngaihtuahna dik leh tha kan neih a pawimawh em em a, kan chhungkua tan leirem kan rahna turin enge kan tih ang tih ngaihtuah ran a, sawrkar in a thlawnin min pe lo a, kan chhungkua in leirem kan rah theihnan kawng min hawnsak tih hi hrereng turin leh peihpunna dap a he Flagship Programme tihlawhtlingtu ni turin a ngenin, duhsakna Aizawl District chhung a SEDP beneficiary zawng zawngte chu a hlan a ni. Beneficiary te chu SEDP hlawhtlin nana ruahmanna kan sorkarin a neih te leh District level Committee te thuawih leh lo tawiawm zel turin a chah a bawk a ni.

Khuallian in Family Oriented SEDP Programme a hawn rual hian screen atangin Mizoram Rural Bank chuan Beneficiary mi 33 te account ah transaction a ti nghal a ni.

SEDP District Level Committee member 25 an awm mek a, an ni bakah hian prominent person 16 ruat belh a ni bawk a. AMC Area Local Level Committee 83 leh Village Council Level Committee 65 an awm bawk a. Line Department pakua- Agriculture, Horticulture, Animal Husbandry and Vety, Fisheries, Land Resourses, Soil and Water Conservation, Commerce and Industries, UD&PA, Tourism leh Sericulture an awm. Aizawl District chhungah constituency 12 awm in, constituency tin atangin beneficiary 1500 thlan a ni a, an vaiin 18000 an awm a ni. Second Installment hi sawrkar ruahman dan chuan November thla lama peih fel hman tur a ni bawk a ni. Aizawl District chhungah hian AH & Vety Department hnuaia trade thlang mi 7716 awmin an tam ber a. Commerce & Industries hnuaiah mi 6951 an awm a, Horticulture Deparment hnuaiah mi 957, Agriculture Department hnuaiah mi 850, Land Resourses Department hnuaiah mi 833, UDPA hnuaiah mi 525 , Fisheries hnuaiah mi 138, Tourism hnuaiah mi 23 leh Sericulture Department-ah hnuaiah mi 3 in trade thlangin Tuivawl Constituency a mi an ni bawk a ni.

Minister hi MLA te Pu C. Lalmuanpuia, Prof F. Lalnunmawia, Pu Zothanmawia leh AMC Mayor Pu Lalrinenga, Deputy Mayor Pu R.Thanglura, AMC Councillor te Pi Lalawmpuii, Pu Lalfakzuala Chenkual leh midangten an tawiawm a ni.

He hun hi SEDP District Level Committee Chairman Dr. Lalhriatzuali Ralte chuan a kaihruai a; SEDP Member Secretary Pi Ethel Rothangpuii hnen atangin Report tawi ngaihthlak a ni a. Rural SEDP Beneficiary, fu chingtu, Pu RC Vanlalrawna, Phulpui leh Urban SEDP Beneficiary Pi Lalrinawmi, Kulikawn hnen atangin thusawi ngaihthlak a ni a. Pu R. Vanrengpuia, Addl. Deputy Commissioner chuan lawmthu sawiin he hun hi a khar a, mi tha hnem tak an kalkhawm a ni.