1754/2022-2023
Lunglei the 30th, August 2022: Vawiin khan DC Conference Hall, Lunglei ah Pu Kulothungan A, IAS, Deputy Commissioner, Lunglei kaihhruaiin District Consultative Committee/District Level Review Committee/District Level Security Committee Quarter Ended June 2022 meeting neih a ni. Meeting ah hian Pu Lawmawma Tochhawng, MLA & Vice Chairman, HPC Lunglei, District Lead Bank Manager Pi Lalremsangi, NABARD, DDM Pu Evan T Munsong, MUP, YMA,RBI bakah Bank hrang hrang Manager-te leh Line Department hrang hrang aiawh te an tel a ni.

Pu Kulothungan A chuan he hun hmang tura lo tel zawng zawng te a lo lawm a, Bank-te chu ram hmasawnna hnathawktu pawimawh tak an nih thu sawiin Bank Manager kalkhawmte chu an Bank hmalakna apiangah mipui hmasawnna leh an hamthatna dah pawimawh hmasa ber thin turin a chah a. Kawng hrang hranga Lunglei District ti hmasawn turin Bank leh Line Department tangkawp ten theihtawp chhuaha hma an lak a tul takzet a ni,a ti. Bank leh loan kalphung mipuite zirtirna Financial Literacy Campaign pawh uar zawka kalpui turin kalkhawmte a chah bawk a ni.

Pu Lawmawma Tochhawng pawh in Bank te hi Lunglei District ti hmasawn tu pawimawh tak an nih thu sawiin Bank dawr tute nena inkungkaihna tha neia, thil an hriat loh te hrilh fiaha lo tanpui turin a ngen a ni. Lunglei District in Agriculture lama hma kan sawn theih nan leh kan lo intohdelh theih nan lo neitute hnenah ah atam thei ang ber loan lo pe turin leh zirna lama hma kan sawn theih nan educational loan pe chhuak tam turin leh zirlai te hnenah educational loan chungchang awareness tam zawk pe turin Bank Manager te a chah a ni.

He meeting a pharh June 2022 quarter tawp a Lunglei District chhunga Bank hrang hrang te hmalakna tlangpui chu hetiang hi a ni. Bank hrang hrang ten Bank Security an neih bakah CCTV, Fire Extinguisher leh Security Alarm System dah thu tarlan niin, Lunglei Police te nen thawhhona tha tak an neih thu tarlan a ni bawk. Bank zawng zawngin mipuite hnena Coin dawn leh pek chhuah pawm tur a tih a ni. Lunglei District chhunga Bank Credit Deposit Ratio(CD Ratio) April-June 2022 ah 65.12% a ni. Reserve Bank of India in CD Ratio a bituk zat chu 60% niin Bank thenkhat 60% phalo te pawh tan la tura hriattir an ni. Agriculture, MSME leh Other Priority Sector te hnena loan pekchhuah chungchang pawh sawiin June 2022 quarter thleng khan Agriculture hnuaiah target cheng nuai 4832.09 ah cheng nuai 933.25 an pe chhuak a, MSME hnuaiah target cheng nuai 5521.71 ah cheng nuai 1523.15 an pe chhuak tawh bawk. Other Priority Sector hnuaiah target cheng nuai 3071.65 ah cheng nuai 931.11 an pe chhuak a ni. Kuthnathawktute tana loan Kisan Credit Card (KCC) Crop loan ah mi 859 te hnenah cheng nuai 535.94, Animal Husbandary & Veterinary ah mi 303 te hnenah cheng nuai 295.04 bakah Fishery ah mi 2 hnenah cheng nuai 2.50 an pe bawk. Prime Minister's Employment Generation Programme (PMEGP) ah June 2022 thleng khan mi 24 te hnenah loan cheng nuai 44.44 pe chhuakin Pradhan Mantri Mudra Yojana( PMMY) ah June 2022 thleng khan mi 221 te hnenah cheng nuai 488.41 pek chhuah a ni bawk.

Thingtlang khua a cheng te tan Banking Service ruahmansak dan Financial Inclusion Plan chungchang pawh sawiho niin Lunglei District chhunga mi 2000 aia tlem chenna khua 134 awm ah khaw 100 te chu Bank Branch emaw Bank aiawh leh Business Corespondent an cover tawh a, khaw 34 te pawh tuam chhuak tura ruahmanna siam turin Bank te chu hriattir an ni.