No.208/2021-2022


Aizawl, the 20th April 2021: Vawiin chawhnu khan Aizawl DC’s Conference Hall-ah Bawrhsap Dr Lalhriatzuali Ralte, Chairman, District Disaster Management Authority/District Task Force on Covid – 19 kaihruainain Aizawl District chhunga Covid-19 hrileng dona kawnga hmalaknate thlir ho a ni a. Chak zawka hmalak dan tur te rel a ni.

Meeting kaihruaitu, Aizawl District Bawrhsap chuan Covid 19 hrileng thawhnihnaah Aizawl District chhungah pawh hrivei an pun chhoh zel tak avangin District Administration lam pawhin theihtawp a chhuah mek tih a sawi a. Ramri hrul atanga lui kana rawn lut zawng zawng te pawh, hri an vei leh vei loh test vek an nih theih nan pawh hmalak tum a ni a ti. Bawrhsap chuan Sawrkar anga hmalakna te chu a sawt zawkna tur leh kan zavaia himna turin mipuiin thuawih taka kan zawm tlan a ngai a ni a ti a. Pawnchhuah khapna thupek pawh khauh zawka bawhzui tum a nih rualin mipuite thuawihna a pawimawh ber zawk tih a sawi a. Khawtlang hruaitute – a bikin Local Level Task Force(LLTF) inpekna fakawm a tih thu te leh Vaccine kalpui meka Vaccine lakna(session site) thlengtu Local Council leh YMA te thil phalnaah pawh lawmthu a sawi bawk a ni. 

Aizawl District Bawrhsap hoa thutkhawmah hian Covid-19 dona kawnga inkhuahkhirna hmalak mek chungchang te, Quarantine Centre/Covid 19 Quarantine Facilities(CQF), Covid Care Centre(CCC), Vaccine kalpui mek leh Sample collection kalpui mek chungchanga hriattur pawimawh te ngaihthlak a ni a. Meeting-ah hian  Chief Medical Officer – Aizawl East leh West, District Immunization Officer - Aizawl East leh West, Integrated Disease Surveillance Project(IDSP) thawktute, Police, AMC leh Incident Commander ten hmalak kalpui mek chungchang  leh hmalak ngai lai te an sawi a ni.

Bawrhsap hoa thukhawm chuan hrivei hmuchhuah belh zel a nih avangin tunhmaa Covid Care Centre hman thin te chu thar thawh leh a, a hmaa lo awm sa aia tam zawk siam belh a rel a. Ni 7 inkhung hrang tawhte anmahni vak chhuaka RT-PCR  awmna hmun va pan kher loa RT-PCR a test tura  an sample laksak a nih theih dan tur pawh rel a ni a. Ruahman ang chuan ni 7 chuang Home Quarantine tawh te sample hi an awmna hmunah laksak an ni tawh dawn a ni. Ni 7 leh ni 10 inkarah Home Quarantine a awm te sample hi lak a ni dawn a; thawktute remchanna angin ni 7 ni chiah chiahah sample hi lak theih vek a ni dawn lo a; hei hi mipui leh sample laksak ngai ten an lo hriat lawk a that thu Doctor te chuan an sawi a. CCC, CQF,etc., a bawlhlawh senghawi chungchang pawh sawi fiah a ni a. Bawlhlawh lakkhawm tur te hi darkar 72 chhung khawih loa a dahkhawmna hmun leh bawlhlawh bawma a awm a ngaih a vangin lakkhawm zung zung chi a ni lo tih sawi a ni a. Darkar 72 hnuah chuan khawih a hlauhawm tawh loh thu leh bawlhlawh dangte nen ang khat vek a ni thawh thu Doctor te chuan an sawi a. Inkaihruainaa awmsa angin heng bawlhlawh te hi CCC, CQF,etc bulhnai remchang lai leiah khur laiha phum mai theih a ni bawk a ni.

Attachment

  • Loading attachment...