No.209/2021-2022

Dated Serchhip, the 20th April, 2021: Vawiin tlai dar khan DC Conference Hall, Serchhipah Covid-19 avanga inkhuahkhirhna dan thar Mizoram sawrkarin a siam bawhzuiin Serchhip khaw chhunga VC hrang hrang aiawhte leh District thuneituten Meeting an nei.

He hunah hian Bawrhsap Pu Kumar Abhishek, IAS chuan hrileng thawh hnihna hi a hmasa aia hlauhawm zawk a ni tih a hriat theih a, mitin kan fimkhur a tul hle a ni. Kum kalta lamah VLTF ten hri leng laka kan him tlan theih nan rim takin hna an lo thawk tawh a, tun tumah pawh hian theihtawp chhuah leh turin ka sawm che u a ni a ti a. Aizawl AMC leh District khawpuia inkhuahkhirhna dan sawrkarin a siam thar hi khauh tak kenkawh tur a ni a. Chu hna thawk tur chuan pheikhai ruala kan thawh ho a tul a ni, a ti. Loh theihlohna avanga veng bil inkharkhip tul a awm a nih chuan District thnuneitute hnen thlen turin a ngen bawk a ni.

Meeting  kaihruaitu Pu Lalmuansanga Ralte, MCS, Addl. DC pawhin thusawiin, India ram ril zawkah hri kai an tam hle a, Mizoramah pawh state dang atanga lo haw tharten an kai nasa in a darh chho mek a ni tih a hriat theih a. Damdawi lama inenkawlna hmun kan neih tlem dan te rilrua hre reng chungin kan kai darh vak hmaa kan lo inven hi a tul tak zet a, VLTF te nen theihtawp chhuaha kan beih tlan a tul tak zet a ni, tiin VLTF te chu thawhpuiah a sawm a ni. Bazar puiah bazar khawm a rem dawn lova, Dawr inhawngte pawhin mahni veng VLTF te hriatpuinaa hawn a ngai dawn a ni, a ti bawk.

Pu PC Laltanpuia, Addl. SP pawhin thu sawiin, Police thawktute lam indaihlohna avangin VLTF tel lo chuan inkhuahkhirhna dan lekkawh kawngah hma an lak tak tak theih loh thu sawiin VLTF te chu thawhpui atan a sawm a. Inkhuahkhirhna dante pawh uluk taka chhiar tura ngenin, VLTF duty tur ten chiang taka hre theuh turin a chah a ni. 

Dr. Lalhlunpuii, DIO, pawhin thusawiin a tul tawpah lo chuan pawn chhuak lo tura inzirtir a tul hle tih sawiin, chhiatni thatni ah pawh sawrkar kaihhruaina hi zawm hram hram turin mipuite a ngen a. Hmun dang atanga lo hawte tan inkhunghran a pawimawh a, kar 1 hnu lamah chauhte a natna a lan chhuah chauh thin avangin dawhthei taka ngaihchan a tul a ni, a ti. Hri kai inrinhlehlhna nei tan District Hospitalah RAgT Test Rs. 200 leh TruenNat test Rs.1000 in a tih theih reng thu a sawi bawk.

District Bawrhsap chuan a hnuai tarlan sawrkar ruahmannate kalpuia, tha taka lo kalpui theuh turin VLTF te a ngen a ni.

1.       Pawn chhuak reng rengin hmai tuamna face mask emaw hmanraw dangin emaw hmai an tuam vek tur a ni a, mi dang nena feet 6 tala inhlatin an awm tur a ni.

2.       Chhungkaw nitin mamawh dawr hrang hrangte chu VLTF remtihna leh ruahmannain hawn phal a ni ang a, tlai dar 5:00 PM-ah khar vek tur a ni ang.

3.       Bazar hmunah chawhmeh leh thil dang zawrh phal a ni lo a, VLFT-te ruahmannain mahni veng chhung theuhah veng miten an mamawh an lei theih nan hmun remchang laiah chawhhmeh leh thil dang zawrhna siam a ni ang.

4.       Contact tracing a chhui telte bakah Mizoram pawn atanga lo lut, RAgT negative-te pawh ni sarih (7) chhung khauh taka home quarantine tur an ni a. Nikum lama tih thin danin home quarantine diltute chu VLTF-in an in hmunhma a rem leh rem loh endikin lehkha ziakin phalna chu Deputy Commissioner hnenah an dilsak thin ang.

5.       Home quarantine-na hmun mumal nei lote tan veng/khaw tinin Community Quarantine Facility pakhat theuh neih tur a ni a, VLTF-in hmun remchang tur lo ngaihtuah se, Deputy Commissioner hnenah quarantine centre atana thlan fel thu chu report an pe ang. Heng centre-a awmte awm man leh test man chu quarantine-na hmuna awmten an pe ang a, quarantine kalpui leh enkawl chu VLTF-te kutah a awm ang.

6.       Ram pawn atanga dàn lova lo lut an awm leh awm loh VLTF-in vịl ni se,   rinhlelhawmte chu thuneitute hnenah report ni se. Dan ang taka lo lutte pawh an covid test certificate neihte enfiah ni se. A dik lo an awm emaw rinhlelhawm emaw an awm chuan swab sample test tir tur an ni ang a, test result nghah chhungin an lo inkhung hrang tur a ni bawk ang. Test man hi anmahni chawi tur a ni ang.

7.       Bawlhhlawh paih motor a lo kalin bawlhhlawh paihtute'n hmai tuam ngei tur a ni tih mipuite hrilh hriat thar leh ni se.

8.       COVID-19 kaihhnawiha awm dan tur- hmai tuam, social distancing, etc. ngaih pawimawh thar a nihna turin VLTF-in hma la se.

9.       Dawrkai reng reng leh dawra thil leiten an hmai an tuam tur a ni a. Dawr neituten anmahni dawrtute chu register-ah ziak lutin emaw Sulhnu app hmangin emaw mumal takin chhinchhiah vek tur a ni. Hei hi hnuchhui nan a pawimawh avangin tih ngei tur a ni. 

10.     Home quarantine-a awm chhungkaw member-te pawh pawn chhuak lo leh inlengte nena inchiahpiah lovin ni 7 chhung an awm tur a ni.

11.      Home quarantine-a awm ten COVID-19 inkaihhruainate hi an zawm ngei a ni tih an awmna veng LLTF/VLTF ten an endik thin ang.

12.      Containment zone puan tul a awm a nih chuan Medical thuneitute nena inbe rawn chungin District Magistrate-in District chhungah Containment Zone a puang ang. Containment Zone a puanahte chuan Deputy Commissioner-in thupek a siam zawm tur a ni ang.

13.      Mipui mamawh bungrua leh hnathawhna bungraw chi hrang hrang phurtu motor mahni veng/khuaah luh khap loh tur a ni.