No.2294/2021-2022

Aizawl, the 21st September 2021: Vawiin chawhnua khan Aizawl DC’s Conference Hall-ah Aizawl District Bawrhsap Dr Lalhriatzuali Ralte hovin District Level Steering Committee on Anaemia Mukh Bharat an thukhawm a. He hmalakna hian a tum ber chu Nausen thla 6 leh kum 49 te thisen tlakchhamna lak atanga an him theih na tur leh an hriselna tur ngaihtuah a ni.

Meeting kaihruaitu Dr Lalhriatzuali Ralte, Aizawl District chuan National Health Mission(NHM) hnuaia programme pakhat - Anaemia Mukh Bharat chu hmalakna pawimawh tak a ni tih a sawi a. He hmalakna a hlawhtlin theihna tur chuan tanrual a ngaih thu sawiin a bik takin Health Department hnuaia CMO ‘East’ leh CMO ‘West’ a thawk te, School Education Department leh Women & Child Development Department te an tanrual a ngaih thu a sawi a ni.

He hunah hian Anaemia Mukh Bharat hnuaia hmalakna kal mekah department hrang hrang atangin report te ngaihthlak a ni a. Hmachhawp leh hmalak chhunzawm dan tur sawi a ni bawk. Anaemia Mukh Bharat hnuaia hmalakna pawimawh tak pakhat chu damdawi – Iron Folic Acid(IFA) - Atui leh Mum semchhuah a ni a. Anganwadi Centre-ah te Naupang thla 6 atanga kum 5 thleng te tan damdawi tui (Syrup) pekchhuah a ni a; Sikul-ah Primary Level tan IFA pink(junior tablet) sem a ni a, Middle atanga Higher secondary level-ah IFA Blue Tablet sem a ni leh a. Heng bakah hian Raipuar leh Nu nau hnute tui pe lai leh Reproductive Age huam chhunga Hmeichhiate tan IFA Red table te Health Sub-Centre kaltlanga semchhuah a ni.