No.2295/2021-2022

Aizawl, 21st September, 2021 : Vawiin khan Mizo Language Board (MLB) study team te chu Pu L.Thangmawia, Vice Chairman, HRD Board office chamberah an thukhawm a, Mizo language Board din tura hmalakna kal mek an thlirho.

He thutkhawm hi study team Chairman Pu L.Thangmawia’n kaihruaiin hmalak tawh dan leh thil kal mekte a sawifiah a, harsatna dang a awmloh chuan Mizo Language Board Bill hi kumthar Assembly session-ah pharh hman beisei a nih thu a sawi a. He bill draft peih a nih theihnana rim taka thawktu Mizo tawng lama kan mithiamte leh pawl hrang hrangte hnenah lawmthu sawiin “Mizo tawng vei em em tu Chief Minister kan neih avanga HRD Board in MLB din tura hma la kan ni a, kan HRD Board Chairman Pu Lalchhandama Ralte, Education Minister-in he bill hlawhtlin theihnan vawi engemawzat official te nen meeting ko tawhin chak takin a bawhzui a ni” a ti.

He thutkhawmah hian Dr H.Laldinmawia, Asst. Professor, Mizo Department, Pachhunga University College chu Mizo tawng chungchangah Minor Research Project kalpui tura ruat a ni a. He Minor research project hnuaiah hian Mizo tawng tobul chhuichian te, Mizo tawng than chhoh dan chhuifiah te, Mizo tawng kalhmang leh nihna chhui zau, Mizo tawng hmasawn zel theih dan tur kawng chhui leh Innghahna tlaka Mizo tawng chanchin chhuichian te zichian a ni ang a. Thla li chhunga he project hi zo hman tura beisei a ni.

Mizo tawng chungchang ah State Level Webinar buatsaih nise tih a ni bawk a. He Webinar buatsaih hna hi Mizo tawng lama committee te din a, kum tamtak lo buaipui tawhtu leh buaipui mektu Mizoram Board of School Education(MBSE) mawhphurhna ah dah a ni bawk.

Human Resources Development Board chuan zirna kaihhnawiha Webinar a buatsaih hrang hrangte feedback leh a kaihhnawih zirchian ngaite lo zirchiang turin Prof. Lynda Zohmingiani, Department of Education, Mizoram University chu kum khat chhung atan Consultant-ah a ruat a, a ni hian feedback bakah rawtna a tul angin HRD Board-ah a thehlut ang.

MLB Study team meeting-ah hian Pu J.H.Zoremthanga, President, MBSE; Pu Rozama Chawngthu Ex-Principal, Synod HSS, Dr Chawngthanpari, Ex-Principal HATIM, Lunglei leh Pu VL Kroshnehzova, member-Secretary te an tel a, damlohna avanga tel thei lo Prof. Laltluangliana Khiangte tih loh chu an tel kim a ni.