Nitina mamawh pawimawh ber te zinga mi Eirawngbawlna Gas chungchang pawimawh tak tak sawi ho in vawiin khan Aizawl District Bawrhsap Pu Kannan Gopinathan chuan ama Office ah Indane Gas Officials te leh Aizawla Gas Distributor hotu te a kawm.

Gas Booking leh connection tih atanga Gas Cylender lak thlenga mipui tana buaithlak leh harsatna awm thin a ngaimawh thu leh sawiselna hrang hrang awm thin chu sutkian dan ngaihtuah ho a ngaih thu District Bawrhsap chuan sawiin Distributor te dinhmun pawh hriatthiampui anih rual in Gas chu mipui mamawh anih miau avangin mipuite hmakhua thlir pui a tul thu a sawi a. Chutih lain Mipui atanga sawiselna an dawn tam takah a dik ngei tih hriat chian ah chuan a tul anga hmalak a nih tur thu leh chu chu lo hrethiam a ngaipawimawh turin a ngen nghal a ni.

Gas mamawh tu te tana harsatna sutkian pui zel dan tur leh a manto (Black market) a hralh anih loh nan a hmalakna hrang hrang te sawiin Pu Kannan Gopinathan chuan Mobile Phone atanga Gas Booking awlsam taka tih dan tur duanchhuah IVRS a sawifiah a. Phone No.9089024365 ah phone call in emaw SMS hmangin emaw book theih anih thu leh Aizawl DC Office a hriat duh neih chuan Facebook ah Aizawl Bawrhsap Pisapui ah en theih anih thu a sawi bawk.

Pu J K Brahma, Chief Area Manager, Indane Official pawh in Indane Gas chungchanga Distributor te hriattur pawimawh tak tak sawiin IVRS (Interaction Voice Respond System) hi duanchhuah thar a nih rualin Mizoram ah pawh hman theih a nih thu a sawifiah nghal .

Vanbuangi Gas leh Biakkungi Gas Distributor hotute pawh in inkawmho na leh tul inhrilhna hun tha tak neih chu a lawmawmin hlawkthlak an tih thu an sawi a. Gas sem chhuah leh thil dang dangah Phairam (Plain) leh Mizoram – tlangram chu kawng tam takah a in an loh avanga harsatna leh buaithlakna awm thin te sawiin dan (Rules) an siam thenkhat te pawh phai zawla chengte tinzawn a ni in tlangrama mite tan chuan zawm hleihtheih loh te pawh a awm ve a ni an ti a. Chutih laiin thil tha hi vawi lehkhatah hmin nghal mai thei anih loh avangin inhriatthiam tlanna an mamawh dan te an sawi  ve nghal a ni.