2699/2022-2023
Aizawl 17th November 2022: Aizawl District Bawrhsap Dr Lalhriatzuali Ralte chuan nimin (16.10.2022) khan Aizawl East District Civil Supplies Office hnuaia Retailer-te buhfai sem dan a hmuna tlawhin a endik a. Retailer ten buhfai leh thil dang Public Distribution System (PDS) kaltlanga mipui hnena sem hna an thawk tha em tih a enfiah a ni.

Azadi Ka Amrit Mahotsav hmanna kal zelah Department of Food & Public Distribution, Government of India hmalaknain India ramah Fair Price Shop (buhfai semna) 5000 vel tlawh chhuah runpui neih mek a ni a. Aizawlah pawh Bawrhsap chuan Aizawl East DCSO hnuaia retailer 3 - Electric Veng, Chhinga Veng leh Aizawl Venglai te a tlawh a, central lam atanga format duan sa hmangin endikna a nei nghal a ni. Endiknaah hian a hmunhma, quality control, service delivery system leh mipuite harsatna sutkianpui dan (grievance redressal) a tha tawk em tih te chu en a ni a. Aizawl East District ah hian Ration Card 29687 a awm mek a, ration card zawng zawngte hi Aadhar card nena thlunzawm an ni tawh a ni.

Mipuite tana hmuh awlsam tur leh hman tangkai theih turin Vigilance Committee member list tarlanna leh complaint thehluhna tur remchang siam turin Bawrhsap chuan DCSO leh retailer-te a hriattir a, hnathawhna sawn avanga ration lakna hmun sawn kawnga harsatna awm thin chu One Nation One Card scheme hmangin Card siam danglam ngai lovin awlsam taka retailer-te kaltlanga sutkian theih a nih mai thu te, mahni awmna hmun zel atanga lak theih a nih tawh thu leh he hamthatna hi mipuite hriattir a, zirtir uar zel turin retailer-te leh ditstrict hotute chu Bawrhsap hian a chah a ni. Ration semna hmun te chu mipuite tana hriat hran awlsam zawka rawng inang veka chei that ni se tih a rawt bawk a ni. Bawrhsap hian ration la tura intlar mipuite chu an retailer leh buhfai semna kawngah harsatna an neih te zawtin, e-pos khawl hmanga buhfai sem kawngah mipuite tana harsatna awm thei te sutkian dan tur hi department official-te nen an sawiho nghal bawk. Bawrhsap hi DCSO East Pi Lalhlimpuii Ralte, Sub Deputy Commissioner Dr Lalthanchami leh District Programme Manager ten an tawiawm a. Bawrhsap hian thla hmasa khan Aizawl West DCSO hnuaia Retailer pathum- Tuikual, Tuikhuahtlang leh Khatla te pawh a lo tlawh tawh bawk a ni.