2700/2022-2023
Aizawl 17th November 2022: Vawiin khan Tuirial bialtu MLA & Vice Chairman, Commerce & Industrial Development Board Pu K. Laldawngliana chuan Lungdai Cultural Meet 2022, a hmanpui.

Khuallian Pu K. Laldawngliana chuan thu sawiin Lungdai Cultural Meet – 2022 hmanpui tura sawm hi a ni chu a lawmthu a sawi a, Cultural Meet - hi hlim leh lawm taka hmang turin duhsakna sang ber hlanin, he hun hmang tute hian kawng khat tala hmasawnna nei ngei se a tih thu sawiin. Zai leh rimawi hian Mizo nunah hmun pawimawh tak a changin rimawi hi Mizo ten kan ngaina a, kan nunphung, khawsak leh thawnthu te hi thu leh hla hmangin kan puang thin a ni a ti a. Lam chi hrang hrang kan nei te- Cheraw, chheih lam, khual lam, rallu lam, sarlamkai leh solakia leh lam dangte en ho na kan nei thei tur hi kan vannei em em a ni a ti a.

Khuallian chuan Mizo te hi hnam vannei tak kan ni a, kan pi leh pu te hunah Zawlbuk kan nei a, Zawlbuk ah tlawmngaihna te, aia upa zahna te leh kut themthiamna leh thil dang dang zirna hmun tha tak kan nei a. Hei hian Mizote nunah nghawng tha tak neiin zonun ze mawi zirna tha an nei a. Zawlbuk khan nasa takin kan pi leh pu te nunah pawimawh na a nei a, Zawlbuk an nei kha an vannei em em a ni. India in zalenna a neih hnuin Zawlbuk tihbo a lo ni ta a. Amaherawh chu vanneihthlak takin YMA kan nei a. Kan hnam rohlu kan neih te zingah YMA hi a ropui ber zinga mi niin, Zawlbuk a kan zir zonun ze mawi zawng zawng te bo mai lovin YMA in a chawi nung ta zel hi kan vannei tak zet ani. Vawiin thlengin tlawmngaihna, aia upa zahna te chu YMA in a vawng nung ta zel ani. Kei ngei pawh hun engemaw ti chhung chu YMA lam rawngbawlna ah theihtawp lo chhuah thin in Pathian leh mipui te zarah President - nihna hial te pawh ka lo chelh ve tawh a. Mi rethei leh chhumchhia te ngaihsak a, an harsatna zawng zawng chhawmdawl tu chu YMA hi a a ni tiin a sawi.

Khuallian chuan Zonun ze mawi tungding leh turin theihtawp chhuah ila, Zonun ze mawi aia upa zah, tlawmngaihna te i chawi nung zel ang u tiin he hun hmangtute zawng zawng duhsakna a hlan a ni.

Lungdai Cultural Meet 2022 hi YMA Hall, Lungdai ah hman niin Pu C. Lianhmingthanga VCP Lungdai kaihhruaina hnuai ah Pastor K.Ramdinthara'n hunserh a hmang a.

Pu Hmingthanzuala, Director Art & Culture Department chu khual zahawm a tan hman niin Hnam lam chi hrang hrang te entir a nih bakah Zaithiam hrang hrang ten kalkhawm mipui te zaiin an awi bawk a ni.