2701/2022-2023
Champhai, the 17th November, 2022: Champhai District Bawrhsap Pu James Lalrinchhana chuan tukin khan Champhai khawpui chhunga Fair Price Shop-te a tlawh kual a; hmunhma buatsaih leh him dante, buhfai neih dan leh buk dan bakah quality-te, sem chhuah dan leh e-POS Machine hnathawh dante, quality control leh service delivery kalpui dante a enfiah a, Pradhan Mantri Garib Kalyan Ann Yojana (PMGKAY) hamthatna dawngtu kawmna a nei nghal bawk.

Pu James Lalrinchhana chuan Fair Price Shop kaltlanga buhfai semchhuaktute chu mipui dikna leh chanvo ngaipawimawh hmasa fo tur leh dan hnuaia rinawm taka thawk turin a chah a. District mipuite pawh an dikna leh chanvote hriaa dan lova thil tih awmte do kawnga tanrualpuiah sawmin, Consumer Rights Redressal Forum tha tih chak deuh deuh a tul thu a sawi a. Fair Price Shop nghaktute chu harsatna an neihte thuneitute hnena thlen thuai thin turin a chah a. Enfiahna atanga hmasawn ngaihna laite a sawipui a; zawm turin a chah nghal bawk.

Tukin Fair Price Shop endikna kaltlang hian Champhai khawpui chhunga Fair Price Shop 8 te enfiah a ni a; Godown leh Fair Price Shop dangte pawh a tahtawla enfiah zel tum a ni. Fair Price Shop-te chu an dinhmun tlangpui tarlanna signboard felfai tak nitina vawng turte, mipuite tana hamthatna awmte hrilhhriatna poster tarlang tam turte leh faina ngaipawimawh turtea chah an ni bawk.

Champhai District Bawrhsap Pu James Lalrinchhana hi Pu C.C Sakhawliana DCSO, Dr. Lallawmkima DIPRO leh Department thawktu te'n an tawiawm a ni.