Ni 15 chhung awh Aizawl District chhung atana Prime Minister Employment Guarantee Programme (PMEGP) loan diltute interview chu vawiin khan a hmawr bawk a ni ta.

Heng loan diltute tan hian DC Office-ah thlahlui July 23 atang khan interview hi neih tan a ni a. Addl. DC Pu Lalchungnunga hovin loan board member dangte nen nitin interview hi neih thin a ni a. Vawiin a hmawrbawk ni khan Pu Lalchungnunga chuan lawmthu sawiin interview neih chhung zawnga Industry, KVI leh Bank hotuten taima taka tlawmngaih chhuaha board-a an thut avang leh tluang taka an zawh theih avanga lawmawm a tih thu sawiin Bank lam hotute pawhin PMEGP hnuaia loan hmu thei tura thlante chu bahlahna awm lova loan an pek ngei a beisei thu a sawi a ni.

Loan diltu hi an thahnem hle a, mi 1654 diltu zinga 1378 chu Aizawl mi niin 405 chu thingtlang mi an ni thung a, heng loan diltu zingah hian lehkha thiam tak tak mahni kutkawiha eizawnna ngelnghet din tum engemaw zat an awm a ni. Loan hmu tura Board in a thlante chu mi 824 an ni a, dilna 830 chu hnawl (rejected) a ni. PMEGP Loan hmu tur te tana Central puihna tur Margin Money chu 1452 lakhs a ni dawn a, PMEGP Loan hmang hian mi tamtak eizawnna pek an ni dawn ta a ni.