Environment & Forest, Labour, Employment & Industrial Training etc. changtu Minister Pu Lalrinmawia Ralte chuan Serchhip District leh Champhai District chhung khaw thenkhat tlawh chhunzawmin nimin khan Serchhip District-a Mualcheng leh East Lungdar a tlawh a, Champhai District-ah Biate, Sialhawk, Khawhai tlawhin vawiin ah Chawngtlai leh Khawzawl a tlawh a ni. Heng khaw hrang hrangahte hian khawtlang hruaitu VC leh tlawmngai pawl hrang hrangte nen inkawmhona hun tha tak an hmang a a Department enkawlte leh an kaihhnawihte hmalakna leh kalphung a an thil hriatfiahloh leh hriatthiamloh te zau taka sawiho niin Sawrkar Official ten a hmunah hian hrilhfiahna hun an hmang nghal zel a ni.

Minister hian nimin zing tukthuan ei hma khan Mualcheng tlawhin BNRGSK Hall-ah khawtlang hruaitute nen an in kawm a, an khawtlangin Forest Reserve zau tha tak an humhalh leh nungchate tha tak leh khaw dangte tan pawha entawntlaka an humhalh chu chhuanawm a tih thu a sawi a, MUP leh YMA ten an Reserved Forest te enkawlpui tura an ngenna chu chhangin Minister chuan ruahmanna an duhdan te a rang lama siam tura hrilhin kumin chhung ngei a tihhlawhtlin dan tur ngaihtuahpui a lo tum dawn thu in a chhang a, Varhva Lui a nungcha humhalh kawnga an thawh that avanga lawmthu hrilh nan Mualcheng Branch YMA te hnenah tangkafai Rs. 7,000/- pe in, Varhva Lui an humhalhna kawnga an chhawr tangkai theih turin “Anti-Poaching Camp”, riah nghal theihna tur Sawrkar kumthar a sak a tum thu a sawi bawk a ni.

Mualcheng a tlawh hnu hian East Lungdar ah kalin R.D Multipurpose Conference Hall-ah khawtlang hruaitute nen an inkawm a, YMA Park enkawlna tura puih dan tur te bakah khawtlang mamawh an thlen te enzui dan tur te an sawiho a, Leng leh Sailulak khawtlang hruaituten Minister hi East Lungdar-ah hian an lo kawm nghal bawk a ni.

Biate BNRGSK Hall, Mual Venga khawtlang hruaitute nen an inkawmna ah Minister chuan Biate khua in Ningtui rama Medicinal Plants Plantation leh Bamboo Plantation atan phal taka ram Hectare 10 lai a zau an pe chu lawmawm a tih thu sawiin neitu nihna thinlung tak nei zui turin a chah a, khawtlang mamawh an thlen te pawh a theih ang ang a bawhzui a tum thu a sawi bawk a ni.

Sialhawk leh Khawhai a tlawhna ah pawh Minister hian khawtlang mamawhte chu a theih ang anga bawhzui alo tiam a, Khawhai Tlang pawh tlawhin tun aia tha zawka chhawr tangkai anih theih dan tur leh humhalh that lehzual anih theih dan tur te khawtlang hruaitute nen a hmunah an sawiho a, theihtawp chhuah a a tha ber tur ngaihtuah tlan puiah a sawm a ni.

Minister hian vawiin khan Chawngtlai leh Khawzawl tlawh lehin khawtlang hruaitute hnenah chuan tuihna insiamna ramngaw enkawl uluk a tul zia te, kuthnathawktute hamthatna Labour & Employment Department kaltlanga an siam te nasa lehzuala ngaihven turin mipuite a sawm a, thalaite hmakhua a lo en lehzual theihna tura Sawrkar hmalakna te pawh uar taka sawiin khawtlang hruaitute pawh nasa lehzuala heng Sawrkar hmalakna ah te beng chhi uluk turin a sawm a ni.

Pu Rinmawia hian ni thum chhungin Serchhip leh Champhai District a khaw hrang hrang 11 tlawhin an tapchhak zawlah pisa a hun hnai sak a, heng khaw hrang hrangte hian an mamawh leh harsatna an lo thlente chu uluk taka ngaihthlaksakin a hmuna tihhlawhtlinsak theih nghal chi te chu a tihhlawhtlinsak nghal a, thil tihhlawhtlintheihloh chi te chu a theihloh chhan tha taka hrilhfiah nghalin bawhzui ngai deuh tur chi te pawh uluk taka chhinchhiah sakin theihtawp chhuah sak a tum thu in a thlah vek a ni.

Pu Rinmawia hian Khawzawl atang Aizawl panin haw kawngah Keifang leh a chheh vela Stone Quarry te a en a thawktute hman turin leh an sahim zawk nan safety helmet a sem nghal bawk a ni.

Minister hi Pu Liankima Lailung, C.F., Northern Circle, Pu C.Lalengliana, C.F., Southern Circle, Pu Lalduhthlana, DFO (Protection), Pu PC Lalchhandama, ACF(Planning), Pu Francis Lianmawia, AWC, LE&IT Department leh Pu Andrew H.Lalremruata, DIPRO, Serchhip ten an tawiawm a, an kalna khaw tinah hian Labour Welfare Scheme leh Vocational Training chungchang awareness campaign uar takin an nei nghal zel a ni.