Pu Lal Thanzara, Health & Family Welfare Minister hovin vawiin khan Chief Minister’s Office Conference Hall-ah Mizoram chhunga ruihhlo leh a kaihhnawih thil chi hrang hrang lo lut leh kaltlang thin nasa zawka dan dan tur sawihona neih a ni.He meeting-ah hian Chief Secretary Pi L.Tochhong, IAS, Pu Zorammawia, IPS, IGP, Pi Lucy Lalrinthari, Judge, Special Court, ND & PS, Aizawl leh Health & Family Welfare Department-a hotute an tel a ni.

He meeting-ah hian hemi kawnga ramchhung khawpui lian hrang hranga Mizoram House, New Delhi, Kolkata, Guwahati, Bangalore, Mumbai – ah te zirlai leh khualzin veivak chinchang hre lutuk lote kutah damdawi hlauhawm thawn thin anih thu leh hetiang laka fimkhur tura hrilhhriatna neih a nih tawh thu sawilan a ni a. Chak zawka ruihhlo leh a kaihhnawih thil Mizorama lo lut leh kaltlang danna kawng pakhat atan Bairabi-ah Excise & Narcotics Department-in Check Gate an siam tawh thu leh hei hi hman thuai beisei anih thu te sawi a ni a. Hei bakah Health & Family Welfare Department hnuaia Food & Drugs Control chu thuam chak nise tih leh; tunhnaiah Drugs License 310 cancelled anih thu leh Drugs License thar pekchhuah dawn pawhin tunhma aia uluk zawka endika fimkhur lehzual nise tih sawiho a ni.