Aizawl the 2nd April: Vawiin chawhnu dar 1.00 khan Aizawl DC Conference Hall-ah Lok Sabha MP thlanna lo awm tura Aizawl District chhunga Voter Verifiable Paper Audit Trail System (VVPATS) khawl hman turte chu thliar hran fel a ni a. Aizawl DC leh Returning Officer ni bawk, Pi Juhi Mukherjee leh Election Official dangte hmuh laiin Indian National Congress te, United Democratic Front (UDF) leh Aam Aadmi Party (AAP) aiawh ten VVPATS khawlte chu a number pawtin, a hmanna tur Polling Station hrang hrang mil zela thliar fel a ni.

VVPATS khawlte hi vote thlaktuin a vote thlak tum tak kha a vote ngei a ni tih a finfiah chawpchilh theihna tura duan a ni a; vote thlakna chu en theih turin lehkha themah a rawn chhu chhuak nghal thin a ni. Hetiang khawl hi Aizawl khawpui chhunga Assembly Constituency (AC) 10 (sawm) ah hman a ni dawn a. Chung AC te chu: Aizawl North I, II & III te; Aizawl East I & II te; Aizawl West I, II & III te; Aizawl South I & II te a ni a. Aizawl khaw pawnah chuan Tawi Bial-a Saitual khaw chhunga Polling Station 5 (panga) ah hman a ni dawn a; VVPATS khawl hmanna tur hi a vaiin Polling Station 217 a ni ang. VVPATS khawl hman tura thliar fel tak te bakah hian, khawl a chhiat palh thula thlaveng tur khawl eng emaw zat pawh polling station mila thliar fel nghal a ni bawk.