Kolasib District chhung constituency pathum Tuirial, Kolasib leh Serlui – a hman tur EVM 76 leh VVPAT 26 te chu vawiin khan hman theih tura endik fel zawh a nih hnuin DC Office a strong room ah dahluh a kalh hnan a ni.

EVM endik hna hi nimin atang khan DC Conference Hall-ah neih tan a ni a. BEL company Engineer pahnih leh political party ten endik hna hi an bei a. Pi K. Vanlalruati SDO (S) leh Pu Lalrinawma, Master Trainer ten hei hi an vil a ni. EVM endik zawh hnu hian EVM paruk (6) ah mock poll nei zui nghalin political party aiawhte hian vawi 1000/ theuh an hmet a. A zavaia endik a nih hnuah kalhhnan (sealed) lehin Strong room-ah dah a ni a. EVM diklo leh felhlel hmuh a awm lo a ni. VVPAT hi Kolasib District chhungah hian a vawikhatna atana hman tur a ni a. Kolasib constituency-ah 18 leh Serlui Constituency ah 8, a zavaiin 26 hman a ni dawn a ni.

Hetih lai hian Training chi hrang hrang Kolasib ah hian tluang taka neih zel a ni a. Vawiin khan Election Officer Pu Lalnghakliana hovin Controll room supporting staff te chuan training an nei bawk a ni.