District Level Committee on Afforestation and Conservation, Aizawl District chu vawiin khan a vawikhatna atan Aizawl DC Conference Hall ah an thukhawm a, hmalakna tur tlangpui an sawiho.

He meeting kaihruaitu Pu John L.T. Sanga, Aizawl DC mawhphurhna la mektu chuan committee nihphung tlangpui sawifiahin, NLUP hmalakna peng pakhat, Mizoram chhunga ramngaw leh nungchate humhalhna   tihhlawhtlinna atana hmalatu Mizoram Environment & Forest Consultative Forum (MEFCOF) ngenna anga  District Level Committee on Afforestation and Conservation chu din a nih thu a sawi a, MEFCOF Vice President Rev. Dr. F. Sangkhuma chuan MEFCOF nihphung leh hmalak tawh dan te sawifiahin Mizoram a ramngaw leh nungchate humhalhna lama hma la turin kum 2004 atanga Mizoram Consultative Forum tih hmingpua hma an lo lak chhoh tawh thu leh, kum 2015 a Mizoram sorkarin NLUP Implementing Agency pakhat atana a hman atangin an pawl hming chu Mizoram Environment & Forest Consultative Forum (MEFCOF) ti a thlak a nih thute a sawi a. Mizoram khaw hrang hrang 118 ah ramngaw leh nungchate humhalhna ‘Zo Theihuan’ neih a nih tawh thu te, chung Zo Theihuan te chu a khaw neitute ta a nih thu leh, a enkawl zuitute chu VC, YMA  leh MUP te an nih thute a sawifiah a. Durtlang Kham kang thin pawh MEFCOF in a vengtu mi 2 (pahnih) ruai a hma an lak thu leh kang lova kum engemawzat a awm hnuah chuan ngaw tha tak a lo nih tak thu te, tunah chuan Durtlang kham ngaw-ah hian saza, sakhi leh vahrit lam chite engemawzat awm tawhin, keite pawh awma hriat a nih thu te ; Champhai Zote a Sathar Khamah pawh duh hun huna sathar hmuh tur a awm tak thute a sawi a. November 22, 2017 ah MEFCOF chuan Lal Thanhawla Auditorium ah inkhawmpui an nei dawn tih a sawi bawk.

Aizawl District  Committee on Afforestation and Conservation thukhawmte hian hmalakna atana tha tura an hriatte huam zau takin an sawiho a. Aizawl District chhungah theih ang angin ramngaw leh nungcha humhalh pawimawhna awareness programme kalpui ni se an tih bakah, Aizawl District  huam chhung khaw tin ten “Zo Theihuan” nei tura hma lo la turin Sorkarin  hriattirna chhuahsak se, ti a MEFCOF in a ngenna chu tihhlawhtlin tum ni se an ti bawk.

Aizawl District  Committee on Afforestation and Conservation ah hian Aizawl DC chu Chairman niin, DFO Aizawl chu Member Secretary a ni a. Member ah LR&S Deptt., LAD, PHED, Agriculture, Horticulture, Soil & WC Deptt., MEFCOF, Central YMA, MHIP, MUP, MJA aiawhte an tel a ni.