Vawiin khan District AIDS Prevention and Control Committee (DAPCC), Aizawl District chu an Chairman Dr Franklin Laltinkhuma, Aizawl DC hovin a Office Chamber-ah April atanga September 2013 chhunga an hnathawhte thlirletna hun an nei a, he meeting-ah hian sorkar department hrang hrang aiawhte an tel.

Dr Franklin Laltinkhuma chuan HIV/AIDS dona hian a natna ngawr ngawr chauh ni lovin do tur kaihhnawih a ngah hle a, department pakhat chauhvin do sen a nih loh avangin kil hrang hrang atanga do a ngai a ni, a ti. Sorkarin a thlawna inenkawlna damdawi a pekchhuah ART damdawi chu AIDS natna veite chuan nitin thlah miahlova ei vek turin a ngen a, thingtlang lama mi te tan pawh he damdawi la tur hian a thlawnin MST Bus-a chuan theih a nih thu a sawi bawk.

He meeting-ah hian April-September, 2013 chhunga HIV/AIDS Programme kalpui dan report Dr Lalchhuansanga Pachuau, District Programme Manager, District AIDS Prevention and Control Unit (DAPCU), Aizawl District chuan a pe a. Report-a a lan danin thlaruk kalta chhung khan thisen 21145 test niin chumi zingah chuan HIV hrik pai mi 466 hmuhchhuah an ni a, ART Centre-ah mi 460 an inziaklut hman. Thlaruk kalta chhunga HIV inkaidarhna lian ber chu mipat hmeichhiatna vang niin 81% a tling a, hetah hian mipa chu 75% niin hmeichhia 89% an ni. A dawtah chuan inchiuna hriau thianghlimlo hmangtute zingah niin 15% a ni a, pathumna chu nu leh pa atanga naute inkaidarhna niin 3% a tling.

HIV hrikpai leh AIDS vei inenkawl ngaite tan department hrang hrangin an theihna zawn theuhvah hma an la a, chhawmdawlna awm thei hrang hrang an pek bakah a vei mekte enkawlna lamah leh la veilote venna kawngah pawh nasa takin tan an la a ni.