Vawiin khan Kawnpui Awithangpa Hall ah Kolasib Dist Child Protection Unit chuan Naupang dikna chanvo leh humhim chungchang zirhona an buatsaih a. He hun hmang tur hian Zirna School tin aiawh pakhat theuh, NGO Pawl hrang aiawh 3 theuh leh Village Council Member te an sawm a. Dist Child Protection Office a mithiam ten zirtirna an pe.

Zirhona sawi hawngtu Pu Lallaisanga, Dist Child Protection Officer chuan Social Welfare Deptt hnuai-ah State Child Protection Society in naupang dikna humhalh leh enkawl hi a kalpui a. Hmalakna atan Juvenile Justice (Care and Protection of Children) Act 2000 chu hman a ni a. Mizoram ah hian Child Portection Society hi kum 2010-2011 atang khan kalpui niin Kolasib Dist ah chuan kum 2012 Jan thla atang khan mumal taka kalpui a ni a ti a. JJ Act hian naupang ten thil an tih sual huna rorel sak dan tur te, midangin an chunga thil sual an tih huna ro rel dan tur te, enkawl leh chhawmdawl ngai an nih huna buaipui dan tur min hrilh a ni a ti bawk. Tunah hian Dist Child Protection Unit chuan naupang harsa bik 25 te enkawlnan sum leh pai a seng mek a ni a ti.

Vawiina Zirhona ah hian Pu C Lalnunfela Legal cum Probation Officer chuan Naupang chunga pawikhawihna thleng chungchang zirtirna a pe a. Pi Zohmingthangi Councellor chuan ‘dik lo taka naupang chhawr leh thil sual tih nana hman’ chungchang a zirtir a; Pi Laltlanmawii Protection Officer-in Dan hnuaia naupang dinhmun a zirtir a. Pi C Lalzawmdiki Protection Officer chuan Khawtlang hruaituten Naupang chanvo kan humhalh sak dan tur a zirtir a ni.

He hun hi Pu R Lalzawmliana President Joint YMA Kawnpui chuan a kaihruai a. Dist Child Protection Officer chuan mi tam zawkin naupang harsatna hi thuneitute hnena thlen an hreh thin a. Khaw hrang hrangah humhalh ngai naupang an awm avangin Village Level Child Protection Committee siam tumin ruahman mek a ni a; hei hi a hlawhtlin ngei kan beisei a ni a ti. Dist Officer chuan an hnenah naupang chunga Dan bawhchhiatna thleng report an dawn hian mi tute emaw chuan a report tu hriat tumin an buaipui thin a. Mahse hei hi sawichhuah loh tur chi anih avangin thawktute chuan khawi-ah mah kan sawi thiang lo a ni a ti a. Tun hnaiah pawh report-tu hriat tuma beitu thenkhat chu an beidawng a ni a ti bawk a. Chuvangin Naupang humhalhna kawnga report an dawn reng reng an hming thup sak vek an nih avangin report nih hi thil hrehawm a ni lo an ti.

Mizoram State Child Protection Society in a sawifiahna ah hringtu nu leh pa te enkawl loha midangin naupang an enkawl chungchang-ah hianMizoram pumah tihfelsak thei tur hmun 4 (Sunshine Society for Children, Laipuitlang; International Poor Children - Seventh Day tlang; Hmangaihte Run - Zemabawk leh Lairam Child Adoption Centre - Lawngtlai) a awm a. Anni hi mipui ten an biak rawn hmasak tur a ni an ti. Hei bakah hian enkawltu neilo ten anmahni In anga an ngaih theih tur Aizawl, Champhai leh Mamit ah siam a ni bawk.