Vawiin khan District Election Officer leh Aizawl DC ni bawk Dr. Franklin Laltinkhuma hovin a pisaah inthlan chungchang meeting pawimawh neih a ni a. MJA aiawh, AIR aiawh, LPS, ZONET leh Doordarshan Kendra aiawhte bakah Media Certification and Monitoring Committee (MCMC) member-te leh Returning Officer-te an tel a ni.

Chanchinbu leh electronic media/cable tv te hian mipui rilru nasa taka a hruai theih avangin Election Commission of India chu a fimkhur hle a, media-te tan kaihhruaina mumal tak a duang a ni. Meeting-ah hian DEO chuan chanchinbumi leh cable tv-te mawhphurhna hriattirin inthlan vuakvetah Model Code of Conduct (MCC) chu uluk taka zawm a nih theih nan thawhpuiah a sawm a, MCC bawhchhiatna a awm a nih chuan candidate-te leh political party mai piah lamah chanchinbumi leh cable tv te lakah pawh dan hmanga hremna chelek theih a nih thu a hrilhfiah. Sakhua leh sakhua, chi leh chi inkara buaina leh tharum thawhna chawkchhuak thei thu puanzar chu khap tlat a ni tiin dan hmanga na taka hrem theih a nih thu DEO chuan a sawi bawk.

Tunlai Mizo thalaite zinga hman lar tak Social Media- facebook, whatsapp, sms leh a dangte chungchang pawh he meetingah hian sawi lan a ni a. Tawngkam na leh uchuak tak, thu belhchian dawllo leh dawt hmanga mimal inpuhnate, buaina chawkchhuak thei video clip leh thlalak thehdarh kawngah fimkhur a tul thu te sawi hovin a tilui te chu dan hmanga hrem ngei an nih theih nana hmalak an rel.

Cable TV kaltlanga Candidate fakna (advertisement) tichhuak duhte chuan Media Certification and Monitoring Committee (MCMC) phalna lak hmasak a ngai a. Print media ah Candidate hriatpuia advertisement tihchhuah a nih chuan ama election campaign senso ah ziahluh a ni anga, a hriatpuina lova chhuah a nih erawh chuan chanchinbu chhuahtu (publisher) chungah dan hmangin action lak theih a ni a, Section 171H of IPC tlawhchhanin hremna lekkawh theih a ni.