Vawiin khan Aizawl District Disaster Management Authority chu an Chairman Pu Vanlalngaihsaka, Aizawl DC hovin DC Conference Hall ah an thukhawm.

Meeting-ah hian Aizawl khawpui chhunga lei min nasat na hmun,min leh mai hlauhawm leh thawm that ngai te sawiho a ni a. Hunthar peng atanga Company peng pan thlakna kawngpui, Dawrpui Vengthar leh Vaivakawn area huamchhunga lei min hlauhawm leh khi awm mek chu a min belh tawh lohna tura chhan dan tur sawiho a ni a. Sawrkar hmalakna awmsaah helai kawngpui pawimawh tak thawm thatna tur sum dah a ni a. DDMA hmalaknaa joint inspection team in helai hmun leh a chhehvel te endikin lei che rengin a nghawng kawng chhak lam, CM bangla zawn thla ko pang thlengin khi a awm tih hmuhchhuah a ni a. Mi thiamten lei min leh mai hlauhawm nia anga lang disaster prone area a puang turin ramri (demarcation) an siam a, he demarcation in a huam hmunah te hian leilung behchhana hmalakna thar – in sak leh lei laih te engmah tih phal a ni lo. DDMA meeting chuan sanction awm sa angin a rang thei ang bera hmalak ni se, plan leh estimate awmsa pawh a rang thei ang bera sanction a nih theih nan sawrkarah thlen ni se, inspection team-in helai hmun hi tlawhin zirchiang leh se tiin thu an dah a ni.

Bawngkawn – Lunglei road, kawngpui bul lawka lei che leh Dinthar Venga Evangelical Baptist Convention Church biak in hmuna lei min tawh thinna hmun pawh vawiin hian DDMA meeting agenda-ah hian a tel a. Dinthar venga lei minna hmunhma hi tun dinhmunah a khik belh tawh rih lo a, lei pawh a chet belh lo niin report a ni a. Bawngkawn-Lunglei road ko pang hi a hmunhma tlawha zir chiang turin DDMA chuan inspection team a din a, anni hian February ni 10 ral hma in an hmuh dan leh rawtna te DDMA ah an thelhlut dawn a ni.