Mizoram assembly election lo awm tur atan a Election Commission Of India in Expenditure Observer 2 a ruat Pu Calvin Haris Kharshling leh Pu Raja Bhattacharjee te chuan vawiin chawhma khan Aizawl DC Committee Room-ah Assistant Expenditure Observer(AEO’s) atan a ruat te nen an thawh ho dan tur leh thil pawimawh dang te an sawipui a. AEO te an kawm zawh hian Accounting team te pawh thil pawimawh Observer te hian an sawi pui nghal a ni. Aizawl Bawrhsap leh District election Officer ni bawk Dr.Franklin Laltinkhuma, IAS leh Pi H.Lalchhandami, Election Officer te pawn Observer te hi an tawiawm a ni.

Expenditure Observer te hian candidate tin te chu inthlan campaign nan sum an hman theih zat pel lo tur leh dik taka sum an hman theih zat bituk an hman theihnan AEO ten uluk taka an vil a pawimawh thu an sawi a. Mizoram chu State ralmuang a nih anga inthlanna felfai leh thianghlim a awm theihna tura a Sawrkar, kohhran leh tlawmngai pawl te lungrual taka thawhhona an nei thin chu entawn tlak leh fakawm an tih thu an sawi bawk.

Aizawl District huam chhunga assembly bial 14 te hi ECI expenditure observer 2 te hian bial 7 ve ve vil tur in chan an insem a. Observer 2 te leh AE0 14 te hian assembly bial 14 chhunga MLA candidate ten election campaign nana an sum hman te nitin an endik dawn a ni.Pu Calvin Haris Kharshling hian 7-Tuivawl,8-chalfilh,9-tawi,10-aizawl north-I,11-aizawl north-II,12-aizawl north-III, 13-aizawl East-I te a chang dawn a. Pu Raja Bhattacharjee hian 14-aizawl east-II, 15-aizawl west-I, 16-aizawl west-II, 17-aizawl west-III, 18-aizawl south-I, 19-aizawl south-II leh 20-aizawl south-III te a vil thung ang.