Vawiin chawhma dar 11:00 khan Serchhip Police Station-ah Serchhip District Addl. DC Pu Lalsangliana MCS chuan Serchhip khaw chhunga a pathumna turin Legal Aid Clinic a hawng.

Hawnna thu sawiin Pu Lalsangliana chuan Mizote chu dan hriatna lama kan la hniam thu leh hemi kawnga hmasawnna kan mamawh thu a sawi a, chutiang atana mipui ban phak, dan lama inkaihhruaina leh inkawhhmuhna tur hmun hawn a ni chu lawmawm a tih thu sawiin mipuiten an hman tangkai ngei a beisei thu a sawi a ni.

Pu Lalsangliana chuan dan hriat lohna hian thiam min chantir loh avangin mahni inhumhim nan leh khawtlang thila hma kan laknaah te pawh dan hre chunga tih zel hi a him a ni tiin dan hriatna lama kan harh thar a tul hlea a hriat thu a sawi a, tin police lam te pawh prosecution incharge ni kher lo mahse he clinic hi dan lama intahhriamna hmun tha leh tanglai taka hman tum turin a chah nghal bawk a ni.

He clinic thar hawnna inkhawm kaihruaitu, Pi Lalrochami Ralte MJS, Secretary, Serchhip District Legal Services Authority leh Civil Judge/Judicial Magistrate ni bawk chuan a kaihruai a, Para Legal Volunteer (PLV) te hnenah card sem nghal a ni bawk. Pi Lalrochami chuan Legal Aid Clinic nihphung leh an hnathawhte a sawifiah a, Serchhip District chu tun dinhmunah Jail-te a la awm rih loh avangin Ukil an awm ve lova, hei vang hian Legal Aid Clinic enkawltu Para Legal Volunteer (PLV) te chu an pawimawh lehzual a ni tiin dan hriatna lama mipuite kaiharhtu leh harsatna nei te tha taka lo tanpui thintu ni turin a chah a, Serchhip District chhunga police station zawng zawngah hetiang clinic hi hawn vek tum a nih thu pawh a sawi bawk a ni.