Vawiin chawhma dar 11:30 khan Pu K. Lal Nghinglova IAS, Tourism Secretary Office Chamber-a Committee thukhawm chuan Thalfavang Kut hman hun atan Nov 29 leh 30 2013 nise, tiin a rel a. He ni hnih awh tur hman theihna tur hian Tourism Department chuan Sorkar laipui atangin kum 2004 atang khan sum a hmu thin a. Mizoram State sum hmang miah lova hetiang intihhlimna hun hmanna tur sum a hmu thin hi a lawmawmin, intihhahdama, boruak thawl taka hmang theuh thei turin mipuite lo inbuatsaih turin beisei an ni.
He hunah hian Stall thahnem tak siamin, lei tur te, eiho tur te thahnem tak awm tura beisei a ni. Mizorama Thlalatu Pawl te pawhin Stall hawngin, he hunah hian thlalak tam tak pho chhuak tura sawm an ni.
Intihhlimna chi hrang hrang leh zai leh music mawi tak tak ngaihthlak tur a awm ang a, Advance Krismas hawi pawha hman theih tur, hun hlimawm tak hman tum a ni.
He thalfavang Kut hi Hmuifang tlanga hman tum a ni a; Aizawl atanga km 50 leka hla, khawvel khualzin mitten an hmuh chak Mizoram mawi tak, ramngaw leh tlangsang boruak nuam tak tak hmuh theihna hmun ngeiah hmang tura buatsaih a ni dawn a ni.
