Aizawl District Election Office chuan Village Council leh Local Council Election a hman tur Ballot paper chhutdan tur chungchang mipuite hriat ah a tarlang a.

Local Council leh Village Council a Ballot Paper-te hi State Election Commission in Ballot Paper Sample a rawn duan ang dungzui a siam a ni a. Ballot Paper hian Counterfoil a nei a, hemi counterfoil ah hian ballot paper serial number leh elector serial number ziahlan na tur a awm a ni. A counterfoil hnuaiah hian Candidate-te hming tlar thlak a ni a chutah chuan a hmasa berah National Party-te dah a ni a, a pahnihna ah State Party in a zui a, chuan Registered Un-recognised party in a zui leh a, a tawp berah Independent Candidate hmingin a zui a ni. Candidate hming hi alphabetical order a rem a ni a, hming bula initial erawh chhiar tel loh a ni.

State Election Commission thupek angin Ballot Paper te hi A4, A3 leh Legal hman phal a ni a. Ballot Paper a hming inkar zau zawng hi 1(one) inch a dah tura tih a ni a. A tlangpui in Ballot Paper te hi A4 paper ah siam an ni a. A4 Paper ah chuan candidate hming 6 (paruk) column vei lamah a leng tawk chiah a, a leng lo zawng column leh lamah dah an ni. Veng khata candidate ngah deuh chu phek khata an lan kim theih nan Legal Paper hman a ni bawk.

Dummy Ballot Paper ah hian a counterfoil hi tihlan tel a ni lova chuvang chuan Candidate hming list hnuai hi la awm zau angin a lang a ni, mahse a nihna takah chuan awl a awmlo a ni.

Candidate te a indawt a an awm dan hi Returning Officer te atangin Dummy Ballot Paper a lakchhuah theih reng a ni. Tin, Polling Station tin ah Candidate te indawt a an awm dan awmna Ballot paper hi mipui hmuh theih ah tar a ni ang. Tin Ballot paper ah hian, a candidate te hming bulah party symbol a awm bawk ang.